Փետրվարի 9-ին Հայաստան է ժամանում ԱՄՆ փոխնախագահ Ջեյ Դի Վենսը

Փետրվարի 9-10-ը Հայաստան կայցելի ԱՄՆ փոխնախագահ Ջեյ Դի Վենսը։ Հայաստանից հետո ԱՄՆ փոխնախագահը մեկնելու է Ադրբեջան։ Այս մասին հայտնում են Պետդեպարտամենտից։ Հաղորդվում է, որ նրան ուղեկցելու է ԱՄՆ պետքարտուղարի տնտեսական հարցերով տեղակալ Ջեյքոբ Հելբերգը:

Հաղորդագրության մեջ նշվում է, որ Հայաստան և Ադրբեջան կատարած այցերի նպատակն է առաջ մղել նախագահ Թրամփի խաղաղության ջանքերը և խթանել «Միջազգային խաղաղության և բարօրության Թրամփի ուղին» (TRIPP) նախաձեռնությունը։

ԱՄՆ նախագահ Դոնալդ Թրամփն ավելի վաղ հայտնել էր, որ ԱՄՆ փոխնախագահ Ջեյ Դի Վենսը փետրվարին կայցելի Հայաստան և Ադրբեջան։

Նա նշել էր, որ փետրվարին փոխնախագահ Վենսը կայցելի երկու երկրներ՝ «խաղաղության ջանքերը զարգացնելու և Թրամփի միջազգային խաղաղության ու բարեկեցության երթուղին առաջ մղելու համար»։

«Մենք կուժեղացնենք մեր ռազմավարական գործընկերությունը Ադրբեջանի հետ, Հայաստանի հետ կստորագրենք խաղաղ նպատակներով միջուկային համագործակցության գեղեցիկ համաձայնագիր, կկնքենք գործարքներ մեր հիանալի կիսահաղորդչային արտադրողների համար, ինչպես նաև Ադրբեջանին կվաճառենք ԱՄՆ-ում արտադրված պաշտպանական սարքավորումներ՝ ներառյալ զրահաբաճկոններ, նավակներ և այլ միջոցներ»,- սոցիալական իր էջերում գրել էր ԱՄՆ նախագահ Թրամփը։

Ջեյ Դի Վենսն ԱՄՆ-ի՝ Հայաստան երբևէ այցելող ամենաբարձրաստիճան պաշտոնյան է։