Civilnet
Կարապետյանը չի կարող լինել ո՛չ պատգամավոր, ո՛չ վարչապետ՝ ելնելով ՀՀ օրենսդրությունից և Սահմանադրությունից, քանի որ հանդիսանում է այլ երկրների քաղաքացի։ Այս մասին փետրվարի 14-ին տեղի ունեցած ճեպազրույցում ասաց ԱԺ նախագահ Ալեն Սիմոնյանը։
«Ինքը չի կարող լինել վարչապետ, ինքը չի կարող ոչ մի բան լինել։ Չգիտեմ, Ռուսաստանում կամ Կիպրոսում ինչ-որ բան փորձի լինի, եթե այնտեղ դա թույլատրելի է իրենց օրենսդրությամբ, ծանոթ չեմ»,- ասաց Սիմոնյանը:
ԱԺ նախագահը նաև կարծիք հայտնեց, թե քաղաքականությամբ զբաղվելը շատերի համար «փախուստի ձև է» քրեական գործերից․ «Նոր մոդա է դարձել, որ ում վրա քրեական գործ են հարցում պարզվում է ինքը վաղեմի քաղաքական գործիչ է»։
Սիմոնյանի խոսքով՝ այս պահի դրությամբ «Քաղաքացիական պայմանագիր» կուսակցության համար ակնհայտ մրցակից չի երևում․ «Պետք է ասեմ, որ այս պահի դրությամբ կոնկրետ մրցակից ակնհայտ չի երևում, և դա միայն իմ կարծիքը չէ, դա մեր քննարկումներն են ցույց տալիս, որովհետև դաշտում կա վաղուց կայացած ուժ, որը լավ կուսակցական համակարգ ունի և իր հավակնության մասին է հայտնել»։
Անդրադառնալով գերիների հարցին՝ Սիմոնյանը ասաց, որ գերիների վերադարձի ուղղությամբ տարվող աշխատանքները շարունակվում են։ «Բոլորն էլ վերադառնալու են․ այսօր չէ, վաղը չէ բոլորն էլ վերադառնալու են»։
Հունվարի 13-ին France 24-ին տված հարցազրույցում Ադրբեջանի նախագահ Իլհամ Ալիևը լրագրողի հարցին, թե հնարավո՞ր է ներում շնորհել Ադրբեջանում դատապարտված Արցախի ռազմաքաղաքական ղեկավարությանը, Ալիևը պատասխանել է. «Դուք պատկերացնո՞ւմ եք Երկրորդ համաշխարհային պատերազմից հետո Նյուրնբերգյան դատավարությունները, երբ նացիստ առաջնորդները դատապարտվեցին մահապատժի, և երկու ամիս անց ինչ-որ մեկը ասեր՝ խնդրում եմ ազատ արձակեք նրանց»։
Պատմություններ
