ՀՀԿ-ն չի մասնակցում հունիսի 7-ի խորհրդարանական ընտրություններին, որպեսզի էլ ավելի չպառակտի ընդդիմադիր դաշտը. այս մասին հայտարարել է ՀՀԿ նախագահ, ՀՀ երրորդ նախագահ Սերժ Սարգսյանը այսօր Երևանում կայացած կուսակցության համագումարին։
Կուսակցության համագումարում իր ելույթում Սարգսյանն ասել է, որ երեք օր առաջ կուսակցության գործադիր մարմնի՝ համապետական ընտրություններին մասնակցությունից հրաժարվելու որոշումը «մի մասի սրտովը չէ»։ Նրա խոսքով՝ կուսակցությունը կարող էր հաղթահարել անհրաժեշտ 4 տոկոսի շեմը, սակայն առաջնահերթությունը այլ է. «Մեզ իշխանափոխություն է պետք, մեզ չի հետաքրքրում մի քանի մանդատ ունենալու հեռանկարը»։
Սարգսյանը նշել է, որ ընտրություններին չմասնակցելու հիմնական նպատակներից մեկն է «ավելի չպառակտել ընդդիմադիր դաշտը» և հնարավորություն տալ մյուս ուժերին իրականացնել իրենց խոստումները։
Նա ընդգծել է, որ որոշումը չի նշանակում պայքարից հրաժարում։ «Չմասնակցելը չպայքարել չէ»,- ասել է Սարգսյանը՝ հավելելով, որ Հանրապետականը շարունակելու է մնալ քաղաքական պայքարի առաջամարտիկներից։
Նրա խոսքով՝ կուսակցության ընտրողները, ըստ սոցիոլոգիական հետազոտությունների, «գրեթե առանց բացառությունների» պատրաստվում են մասնակցել ընտրություններին և քվեարկել ընդդիմադիր ուժերի օգտին, ինչի արդյունքում «մեր ընտրողների ձայները չեն կորչելու, այլ միանալու են ընդդիմադիր ուժերին»։
Սարգսյանը նաև նշել է, որ որոշումը հեշտ չի տրվել, սակայն այն նպատակ ունի ծառայել ընդհանուր քաղաքական հաջողությանը՝ «քաղաքական դաշտում սեփական ես-ը, նեղ կուսակցական շահերը… ընդհանուր հաջողության ստորադասելու» տրամաբանությամբ։
Պատմություններ
