Հույս ունենք, որ առաջիկայում դեպի Գյումրիի օդանավակայան ընթռիչքներ կիրականացվեն թուրքական ավիաընկերություններից որևէ մեկի կողմից: Այս մասին ապրիլի 18-ին կառավարության նիստից հետո ճեպազրույցի ժամանակ հայտարարել է վարչապետ Նիկոլ Փաշինյանը։
«Պրոցեսը գնում է»,- նշել է վարչապետը:
Վարչապետը հայտնել է, որ թուրքական ավիաընկերություններն արդեն իսկ սկսել են չվերթներ իրականացնել դեպի Հայաստան, ինչի վերաբերյալ համապատասխան պայմանավորվածությունը ձեռք է բերվել ավելի վաղ՝ Չինաստանում Թուրքիայի նախագահի հետ ունեցած հանդիպման ընթացքում։ Նիկոլ Փաշինյանը մանրամասնել է, որ թուրքական կողմն է հանդես եկել նման առաջարկով, ինչին հայկական կողմը տվել է իր համաձայնությունը։
«Այդ պայմանավորվածությունը մենք ձեռք ենք բերել Չինաստանում Թուրքիայի նախագահի հետ ունեցած հանդիպման ժամանակ, երբ որ ինքն ասաց, որ եթե Հայաստանը դեմ չի, թուրքական ավիաուղիները կարող են Երևան թռիչքներ իրականացնել»,- ասել է Փաշինյանը։
Անդրադառնալով Հայաստանի, Ադրբեջանի և Թուրքիայի պաշտոնյաների միջև հաղորդակցությանը՝ վարչապետն ընդգծել է, որ այդ շփումները պետք է դիտարկել որպես բնականոն աշխատանքային գործընթաց։ Ըստ նրա՝ թեև գործընթացներում հայեցակարգային նորություններ չկան, սակայն տարվում է ամենօրյա հետևողական աշխատանք՝ հարաբերությունների զարգացման նոր հնարավորություններ գտնելու նպատակով։
«Կարծում եմ, որ վաղուց ժամանակն է, որ հայաստանյան, ադրբեջանցի և թուրք պաշտոնյաների շփումները մեզ համար լինեն աշխատանքային առօրյա գործունեության այդ ընդհանուր ընկալման մեջ»,– հայտարարել է վարչապետը։
Խոսելով Թուրքիայի հետ սահմանի բացման և Ադրբեջանի հետ խաղաղության պայմանագրի ստորագրման հեռանկարների մասին՝ գործադիրի ղեկավարը շեշտել է, որ պրոցեսն ընթացքի մեջ է, և հիմնական խնդիրը ոչ թե իրագործումն է, այլ ժամկետների հստակեցումը։ Նա վստահեցրել է, որ կառավարությունն անում է առավելագույնը՝ արդյունքներին հնարավորինս շուտ հասնելու համար։
Պատմություններ
