ՀԱԿ-ը ներկայացրել է իր նախընտրական ցուցակը. վարչապետի թեկնածուն Լևոն Զուրաբյանն է

Հայ Ազգային Կոնգրես կուսակցության 6(24)-րդ արտահերթ համագումարի ընթացքում հաստատվել են նախընտրական ծրագիրն ու պատգամավորության թեկնածուների ցուցակը։ Ընտրական օրենսգրքի պահանջի համաձայն՝ համագումարի քվեարկությանն է ներկայացվել ցուցակի առաջին 60 անունը, որը գլխավորում է վարչապետի թեկնածու Լևոն Զուրաբյանը, ապա հաջորդում են Արամ Մանուկյանն ու Տաթև Զորյանը։ Կուսակցության ներկայացուցիչների փոխանցմամբ՝ թեև օրենսդրական նոր դրույթը, որով պարտադրվում է ցուցակի առնվազն առաջին 30 համարների հաստատումը համագումարի կողմից, բարդացրել է գործընթացը, սակայն վարչությանն ու աշխատանքային խմբին հաջողվել է մեկամսյա քննարկումների արդյունքում ձևավորել միասնական և համախմբված նախագիծ։

Ցուցակի կազմման հիմքում դրվել են հստակ չափորոշիչներ՝ փորձառու և երիտասարդ կադրերի համամասնությունն ապահովելու նպատակով։ 

Կուսակցության մի խումբ գործիչներ, այդ թվում՝ Արման Մուսինյանը, Վիկտոր Միրումյանը, Վալոդյա Հովհաննիսյանը, Միքայել Մարտիրոսյանը և Աշոտ Սարգսյանը, սեփական նախաձեռնությամբ տեղ են զբաղեցնելու ցուցակի վերջնամասում՝ նպատակ ունենալով ճանապարհ հարթել երիտասարդ սերնդի ներկայացուցիչների համար։ 

Համագումարում ներկայացված 60 թեկնածուների կազմը վերջնական չէ. համաձայն կանոնակարգի՝ վարչությունը լիազորված է համալրելու ցանկը մինչև օրենքով սահմանված նվազագույն 80 հոգանոց շեմը։ ՀԱԿ-ն ընտրական հայտն ամբողջական տեսքով Կենտրոնական ընտրական հանձնաժողով կներկայացվի մինչև ապրիլի 23-ը։