Լուսինե Վարդանյան
ԵՄ-ն ողջունում է Կարսում կայացած Հայաստան-Թուրքիա երկկողմ աշխատանքային խմբի հանդիպումը:
«Հայաստան-Թուրքիա հարաբերությունների կարգավորման գործընթացում առաջընթացը վկայում է տարածաշրջանում ձևավորվող ավելի լայն դրական դինամիկայի մասին, որը կարևոր է երկարաժամկետ խաղաղության և կայունության համար։
Կարս-Գյումրի երկաթուղային կապի գործարկումը կնպաստի տարածաշրջանային կապակցվածության ամրապնդմանը և շոշափելի օգուտներ կբերի Հարավային Կովկասի բոլոր բնակիչներին»,- կարծում են ԵՄ-ում։
ԵՄ-ն նշում է, որ հանձնառու է զարգացնել կապակցվածությունը Հարավային Կովկասում՝ իր «Խաչաձև տարածաշրջանային կապակցվածության օրակարգի», Global Gateway ռազմավարության և Տրանսկասպյան տրանսպորտային միջանցքի շրջանակում, «որտեղ թե՛ Հայաստանը, թե՛ Թուրքիան կարևոր դերակատարում ունեն»։
Հայաստան-Թուրքիա հարաբերությունների կարգավորման շրջանակներում ձեռք բերված պայմանավորվածությունների համաձայ ապրիլի 28-ին Կարսում տեղի է ունեցել Գյումրի-Կարս երկաթգծի վերականգնման և գործարկման Հայաստան-Թուրքիա համատեղ աշխատանքային խմբի հանդիպումը:
. . .
Հայաստանն ու Թուրքիան շարունակում են հաղորդակցությունների վերականգնման տեխնիկական աշխատանքները, որոնցում մեծ տեղ է գրավում երկաթուղու հարցը։
Երկու պատվիրակությունների միջև նախորդ հանդիպումը տեղի էր ունեցել 2025-ի նոյեմբերի 28-ին։ Երկու երկրների համապատասխան գերատեսչությունների ներկայացուցիչները հանդիպել էին Հայաստան-Թուրքիա սահմանի Ախուրիկ-Աքյաքա անցակետում՝ քննարկելու Գյումրի-Կարս երկաթգծի վերականգնման և շահագործման հարցերը։
Աշխատանքային խմբի աշխատանքները մեկնարկել են Հայաստանի ու Թուրքիայի հարաբերությունների կարգավորման գործընթացի հատուկ ներկայացուցիչներ Ռուբեն Ռուբինյանի ու Սերդար Քըլըչի պայմանավորվածությունների արդյունքում։ Վերջին անգամ նրանք հանդիպել են 2025-ի սեպտեմբերի 12-ին Հայաստանի ու Թուրքիայի սահմանին, որից հետո բանակցությունները շարունակել են Երևանում։
Հայաստանի և Թուրքիայի միջև լոգիստիկ հնարավորությունների մասին է խոսել Հայաստանի փոխարտգործնախարար Վահան Կոստանյանը ապրիլի 17-ին CNN TÜRK-ին տված հարցազրույցում։ Նա սահմանների բացման համատեքստում ընդգծել է «Խաղաղության խաչմերուկ» նախագիծը, որը լավ հնարավորություն է համարել մասնավորապես Եվրոպա-Կենտրոնական Ասիա երկաթուղու զարգացման համար։
Պատմություններ
