Ֆրանսիայի նախագահ Էմանուել Մակրոնը մայիսի 5-ին կայցելի Գյումրի։ Նախագահի այցի շրջանակում մայիսի 5-ին քաղաքի Վարդանանց հրապարակում կկազմակերպվի «Երաժշտական կամուրջ» խորագրով համերգ։ Միջոցառումը նվիրված է հայ-ֆրանսիական բարեկամությանն ու մշակութային համագործակցությանը։ Այս մասին տեղեկանում ենք կառավարության ապրիլի 30-ի օրակարգից։
Կառավարությունը նախատեսում է 2026-ի պետական բյուջեի վերաբաշխման միջոցով շուրջ 393 մլն դրամ հատկացնել Կրթության, գիտության, մշակույթի և սպորտի նախարարությանը՝ համերգի կազմակերպման ծախսերը հոգալու համար։
Համերգը տեղի կունենա մայիսի 3-5-ը Երևանում նախատեսված եվրոպական երկրների ղեկավարների գագաթաժողովի օրերին։ Ըստ նախագծի հիմնավորման՝ Գյումրիում միջոցառման անցկացումը պայմանավորված է Ֆրանսիայի նախագահի՝ այդ քաղաք այցելելու հանգամանքով։ Երաժշտական ծրագրում ընդգրկված են հայ և ֆրանսիացի արտիստներ, որոնք ելույթ կունենան Հայաստանի պետական սիմֆոնիկ նվագախմբի նվագակցությամբ։
Որոշման նախագծում Գյումրիի ընտրությունը հիմնավորվում է նաև 1988-ի երկրաշարժից հետո քաղաքի վերականգնման գործում Ֆրանսիայի ցուցաբերած աջակցությամբ և քաղաքում ֆրանսիական մշակույթի նկատմամբ առկա հետաքրքրությամբ։ Նշվում է, որ նախագիծը նպատակ ունի նպաստել Հայաստանի միջազգային վարկանիշի բարձրացմանը և 2027-ին երկրում կայանալիք Ֆրանկոֆոնիայի միջազգային խաղերի հանրահռչակմանը։
Պատմություններ
