«Այսօր, երբ բռնազավթված և հայաթափված է Արցախը, պարտավոր ենք շարունակել հետամուտ լինել հայրենազրկված արցախահայության իրավունքների պաշտպանությանը»,- նշել է Ամենայն Հայոց Կաթողիկոս Գարեգին Բ-ն՝ մայիսի 9-ի իր ուղերձում։
Կաթողիկոսը շեշտել է, որ տասնամյակներ շարունակ այս օրը հայության համար նշանավորվել է նաև արցախյան գոյամարտի հաղթանակով։
Ուղերձում նշվում է, որ Մայիսի 9-ը հայ ժողովրդի համար «թանկ հիշատակների օր» է, երբ հիշատակվում են Երկրորդ համաշխարհային պատերազմում և արցախյան հերոսամարտում հայերի սխրանքները։
«Աղոթում ենք Մեծ հայրենականում և արցախյան հերոսամարտում իրենց կյանքն ընծայած հայորդիների հոգիների համար, որոնց հայրենասիրությունն այսօր էլ ոգեշնչող օրինակ է սերունդների համար՝ նույն պատասխանատվությամբ ու նվիրումով ապրելու, արարելու և պայքարելու ի սեր հայրենի մեր երկրի»,- նշել է Գարեգին Բ-ն։
Նա ընդգծել է, որ Երկրորդ համաշխարհային պատերազմում տարած հաղթանակը «ժողովուրդների համախմբյալ և միասնական պայքարի» արդյունք էր՝ ընդդեմ ֆաշիզմի, անարդարության և չարիքի, և որ հայ ժողովուրդը կարևոր ներդրում է ունեցել այդ հաղթանակում։
Պատմություններ
