Մայիսի 14-ին իրավապահ մարմինները խուզարկել են «Հայաստան» դաշինքի Սպիտակի գրասենյակը։ Կան բերման ենթարկվածներ և ձերբակալվածներ։ Տեղեկությունը հաստատել են Հակակոռուպցիոն կոմիտեից։
«Հաստատում ենք, որ նշված քննչական գործողությունները կատարվում են ՀՀ հակակոռուպցիոն կոմիտեում նախաձեռնված քրեական վարույթի շրջանակներում: Անհրաժեշտության դեպքում կտրվի լրացուցիչ տեղեկատվություն»,- հայտնել են կոմիտեից:
«Հայաստան» դաշինքից արձագանքել են, որ այս խուզարկությունն ու ձերբակալություններն իրենց համար անակնկալ չէր, և իրենց դրանով չեն վախեցնի։
«Իրավապահ համակարգի նմանօրինակ գործելաոճը վաղուց արդեն դարձել է գործող վարչախմբի ձեռագիրը։
Այս գործողությունները ևս մեկ անգամ փաստում են.
իշխանությունը չունի հանրային աջակցություն և սեփական ուժերի հանդեպ վստահություն եւ իր վերարտադրությունը ապահովելու համար դիմում է նման քայլերի։
Տեղի ունեցողը ոչ թե իրավական գործընթաց է, այլ հերթական էժանագին փորձ՝ խոչընդոտելու մեր կառույցների բնականոն աշխատանքը։
Նմանատիպ մեթոդներով իշխանությունը փորձում է վախի մթնոլորտ սփռել, սակայն սա միայն ամրապնդում է մեր համոզմունքը, որ ընտրված ճանապարհը ճիշտ է։
Որևէ խուզարկություն կամ ձերբակալություն չի կարող փոխել մեր քաղաքական օրակարգը. մեր թիմը գիտի ինչի համար է պայքարում։
Մեր քաղաքացիներին կոչ ենք անում իշխանության կողմից իրականացված բոլոր հակաիրավական քայլերի պատասխանը տալ հունիսի 7-ին՝ մերժելով Հայաստանում հաստատված ավտորիտար ռեժիմին»,- ասված է «Հայաստան» դաշինքի տարածած հաղորդագրության մեջ։
***
Վերջին շրջանում պարբերաբար խուզարկություններ են տեղի ունենում ընդդիմադիր ուժերի գրասենյակներում, մասնավորապես «Ուժեղ Հայաստանի»։
Գրեթե ամենօրյա ռեժիմով Հակակոռուպցիոն կոմիտեն «Ուժեղ Հայաստան» կուսակցության անունից հանդես եկող անձանց մասնակցությամբ ձայնագրություններ է հրապարակում, որոնց հիմքով ընտրակաշառք տալու/ստանալու մեղադրանքով քրեական վարույթներ են նախաձեռնվում, անձինք են ձերբակալվում, կալանավորվում։
Պատմություններ
