Ախալքալաք-Կարս երկաթուղու բացումը կնպաստի քառակողմ համագործակցությանը․ Քըլըչ

Ախալքալաք-Կարս երկաթուղու բացումը Հայաստանի համար կարող է նպաստել Թուրքիա-Հայաստան-Ադրբեջան-Վրաստան քառակողմ համագործակցության զարգացմանը։ Այս մասին հայտարարել է Թուրքիայի հատուկ բանագնաց Սերդար Քըլըչը։

«Այս նոր քայլը կնպաստի նաև Թուրքիա-Հայաստան-Ադրբեջան-Վրաստան քառակողմ համագործակցության զարգացմանը, ինչպես նաև կարևոր ներդրում կունենա տարածաշրջանային խաղաղության և կայունության ամրապնդման գործում։ Մաղթում եմ, որ բարեհաջող լինի այս բոլոր երկրների համար»,- «X» սոցիալական ցանցում գրել է Քըլըչը։

Մայիսի 24-ին վարչապետ Նիկոլ Փաշինյանը ֆեյսբուքյան գրառմամբ հայտնել էր, որ Ախալքալաք-Կարս երկաթուղին արդեն բաց է Հայաստանից արտահանումների և ներմուծումների համար։ Նա շնորհակալություն էր հայտնել Թուրքիայի և Վրաստանի գործընկերներին՝ նշելով, որ Հայաստանն այժմ Վրաստանի և Ադրբեջանի տարածքով երկաթուղային կապ ունի Ռուսաստանի, ապա Ռուսաստանի և Ղազախստանի տարածքով՝ Չինաստանի հետ, իսկ Վրաստանի և Թուրքիայի տարածքով՝ նաև Եվրոպական Միության հետ։

Փաշինյանի խոսքով՝ առաջիկայում նախատեսվում է նաև Հայաստան-Թուրքիա, Հայաստան-Ադրբեջան, ինչպես նաև Նախիջևանի միջոցով Հայաստան-Իրան երկաթուղային հաղորդակցության բացում՝ TRIPP նախագծի շրջանակում։