Հունիսի 8-ին կմեկնարկի ամառային զորակոչը

Հունիսի 8-ին կմեկնարկի ամառային զորակոչը։ Հայաստանի կառավարությունը հաստատել է 2026-ի զորակոչի և զորացրման ժամանակացույցը։ Գործընթացը կտևի մինչև օգոստոսի 15-ը։ Համապատասխան որոշումն ընդունվել է կառավարության հունիսի 4-ի նիստում։

Հունիսի 8-ից կսկսվի նախապատրաստական շրջանը։ Երիտասարդները կկանչվեն զինկոմիսարիատներ և կանցնեն բժշկական ստուգումներ։ Իսկ բանակի բուն համալրումը կսկսվի հունիսի 29-ից։ Պարտադիր զինվորական ծառայություն անցած զինծառայողների զորացրումը կիրականացվի հունիսի 24-ից մինչև օգոստոսի 15-ը ներառյալ։

Բանակ կզորակոչվեն այն տղաները, որոնց 18 տարին լրանում է մինչև այս տարվա հունիսի 30-ը։ Կզորակոչվեն նաև նրանք, որոնց տարկետման ժամկետն ավարտվում է մինչև այդ օրը։ Գործընթացին կմասնակցեն նաև կամավորագրված կանայք, որոնք ծառայելու դիմում են գրել մինչև մարտի 1-ը։ Այս նույն ժամանակահատվածում կկազմակերպվի նաև այլընտրանքային ծառայության զորակոչն ու ավարտը։