Հայաստանում 2025 թվականին հայտնաբերված թմրամիջոցների քանակը 2024-ի համեմատ ավելացել է շուրջ 80 տոկոսով։ Այս մասին Ազգային ժողովի պաշտպանության և անվտանգության հարցերի մշտական հանձնաժողովի հունիսի 9-ի նիստին հայտարարեց ՀՀ ներքին գործերի նախարարի տեղակալ Արմեն Մկրտչյանը։
«Ընդ որում, եթե չեմ սխալվում, սրա մեջ սինթետիկ թմրամիջոցների քանակը հինգ անգամ ավելի է եղել նախորդ տարվա համեմատ», - ասաց նա։
Նա նաև շեշտեց, որ ՆԳՆ-ն ունի ռազմավարական մոտեցում, որի համաձայն՝ ջանքերը կենտրոնացված են թմրամիջոցների ներմուծման և արտադրության կասեցման վրա։
«Անհրաժեշտ է կենտրոնանալ ներմուծման և արտադրության վրա, որովհետև թմրանյութն այլ ծագումնաբանություն չի կարող ունենալ. այն կամ պետք է բերվի Հայաստանի Հանրապետություն, կամ պետք է արտադրվի։ Մենք կարող է առաջիկա տարիներին տեսնենք դեպքերի նվազում, բայց խմբաքանակի, այսինքն՝ քանակի աճ։ Այդ դեպքում մենք կունենանք դեպքեր, որոնցով խոշոր չափի թմրանյութ կհայտնաբերենք, և, բնականաբար, դրանք հաջորդիվ չեն տարածվի, և մենք բազմադրվագ մանր դեպքեր չենք ունենա», - պարզաբանեց Արմեն Մկրտչյանը։
Դիտեք նաև՝
Պատմություններ
