Սպիտակ տան բանագնաց Սթիվ Ուիթքոֆն ուղևորվում է Շվեյցարիա, որտեղ սպասվում է Իրանի հետ հնարավոր միջուկային գործարքի շուրջ բանակցությունների առաջին փուլը, ուրբաթ Axios-ին հայտնել է ամերիկյան անանուն պաշտոնյա։
ԱՄՆ նախագահ Դոնալդ Թրամփի բանագնաց և փեսա Ջարեդ Կուշներն արդեն Շվեյցարիայում է, ասել է պաշտոնյան։ Վաշինգտոնի և Թեհրանի միջև գլխավոր միջնորդներից մեկը՝ Կատարի վարչապետ Մոհամմեդ բին Աբդուլռահման ալ-Թանին, ժամանել էր օրվա ընթացքում։
Բանակցությունները պետք է սկսվեին ուրբաթ, սակայն հետաձգվեցին Իսրայելի և լիբանանյան Հեզբոլլահ խմբավորման միջև բռնկված մարտերից հետո։ Պարզ չէ, թե երբ դրանք կվերսկսվեն, ասել է պաշտոնյան։
ԱՄՆ պատվիրակությունը պետք է գլխավորեր փոխնախագահ Ջեյ Դի Վենսը, սակայն հինգշաբթի ուշ երեկոյան նա չեղարկեց իր այցը։ Անհայտ է՝ արդյոք նա կմեկնի շաբաթ-կիրակի։
Բանակցություններին նախորդել է հունիսի 17-ին ստորագրված փոխըմբռնման հուշագիրը, որը նպատակ ունի 60 օրվա ընթացքում ավարտել ԱՄՆ-ի և Իրանի միջև պատերազմը։
Հետաձգումը ցույց է տալիս, թե ինչպես են Լիբանանում ընթացող մարտերը բարդացրել դիվանագիտությունը։ Financial Times-ը և CNN-ը, վկայակոչելով դիվանագետներին, հաղորդել են, որ Թեհրանը պահանջել է երաշխիքներ՝ Լիբանանում ռազմական գործողությունների դադարեցման վերաբերյալ, և պաշտոնյաներից մեկն Իրանի դիրքորոշումն ամփոփել է այսպես՝ գործարք չի լինի, քանի դեռ չեն դադարել մարտերը Լիբանանում։
Մեկ օր առաջ կողմերը պայմանավորվել էին ժամանակավոր ծրագրի շուրջ, որը նախատեսում էր անհապաղ և վերջնական հրադադար՝ ներառյալ լիբանանյան ուղղությունը։ ԱՄՆ նախագահ Դոնալդ Թրամփն ասել է, որ ակնկալում է ամբողջական հրադադար բոլոր ճակատներում՝ ներառյալ Լիբանանը, Հեզբոլլահն ու Իսրայելը։ Հեզբոլլահի և Իսրայելի միջև զինադադարն ուժի մեջ է մտել ուրբաթ։
Իսրայելը հասկացրել է, որ իրեն կապված չի համարում ԱՄՆ-Իրան փոխըմբռնման հետ։ Վարչապետ Բենիամին Նեթանյահուն ասել է, որ իսրայելական ուժերը կմնան Լիբանանում այնքան ժամանակ, քանի դեռ դա պահանջում է երկրի անվտանգությունը։ The Washington Post-ը հաղորդել է, որ ամերիկյան հետախուզությունը կարծում է, թե Նեթանյահուն փորձում է խոչընդոտել Վաշինգտոնի և Թեհրանի միջև վերջնական խաղաղության գործարքը, և որ Իսրայելը մտադիր է շարունակել գործողությունները Հեզբոլլահի դեմ։
Պատմություններ
