Սահմանադրությունը չի կարող մնալ ժամանակից կտրված, կարծրացած փաստաթուղթ․ ՀՀ նախագահ

Հայաստանի Հանրապետության նախագահ Վահագն Խաչատուրյանը Սահմանադրության օրվա առթիվ շնորհավորական ուղերձում ընդգծել է, որ Սահմանադրությունը պետք է ունենա ներքին կենսունակություն՝ արձագանքելու հասարակական հարաբերությունների զարգացմանը, պետական կառավարման կատարելագործման անհրաժեշտությանը և երկրում ու աշխարհում փոփոխվող իրողություններին։

Նախագահը նշել է, որ այդպիսի զարգացումը չի նշանակում հրաժարում հիմնարար սկզբունքներից ու պետության հիմնադիր արժեքներից, այլ հնարավորություն է տալիս պահպանել Սահմանադրության արժեքային հիմքերը՝ դրանք ներդաշնակեցնելով ժամանակի պահանջներին։

Խաչատուրյանի խոսքով՝ Սահմանադրությունը լիարժեք ուժ է ստանում այնտեղ, որտեղ այն ընկալվում է որպես համակեցության անբեկանելի կանոն, իսկ պետական իշխանությունն իր նպատակին ծառայում է միայն Սահմանադրության էությանն ու սկզբունքներին անվերապահորեն ենթարկվելու դեպքում։

Հուլիսի 5-ի Սահմանադրության օրվա ուղերձում վարչապետ Նիկոլ Փաշինյանն անդրադարձել է նոր Սահմանադրության ընդունման օրակարգին։