Գագիկ Ծառուկյանը երկու ամսով կալանավորվեց։ Դատարանը հուլիսի 7-ին հրապարակեց որոշումը։
Ծառուկյանի փաստաբան Երեմ Սարգսյանը դատարանի բակում լրագրողներին ասաց, որ իրենց համար անակնկալ չէր որոշումը։
«Այն պահից, երբ այս ապօրինությունները սկսվել են, մենք հասկացել ենք՝ այս գործողությունը լինելու է, որովհետև սա հրապարակային հանձնարարականի արդյունք է»,- ասաց Սարգսյանը։
Նա նաև հայտնեց, որ Ծառուկյանին կտեղափոխեն «Կենտրոն» քրեակատարողական հիմնարկ։
Հուլիսի 6-ի երեկոյան «Բարգավաճ Հայաստան» կուսակցության առաջնորդը ձերբակալվել էր։ Ըստ Քննչական կոմիտեի՝ նա կասկածվում է առանձնապես խոշոր չափերով խարդախություն և փողերի լվացում կազմակերպելու մեջ։
Գործը վերաբերում է Հայաստան-Իրան առևտրային գործարքներին, որոնց շրջանակում, ըստ քննության, հափշտակվել է շուրջ 21 մլն ԱՄՆ դոլարի գույք։
Ծառուկյանի փաստաբան Երեմ Սարգսյանը մեղադրանքները հերքում է՝ պնդելով, որ այս գործով Ծառուկյանի հետ փոխկապակցված ընկերությունը պետք է ճանաչվեր տուժող, ոչ թե Ծառուկյանը՝ մեղադրյալ։ Փաստաբանը գործը քաղաքական ենթատեքստ ունեցող է համարում։
Պատմություններ
