Ֆիոլետովո. մոլոկանների գյուղը Հայաստանում

Լուսանկարները՝ Կարեն Հարությունյանի

Դիլիջանից Վանաձոր ճանապարհին է Ֆիոլետովո գյուղը։ Այն ամբողջությամբ բնակեցված է մոլոկաններով, որոնք այստեղ հաստատվել են 19-րդ դարում։ Ֆիոլետովոյից քիչ հեռու Լերմոնտովո գյուղն է, որը ժամանակին նույնպես ամբողջությամբ մոլոկանաբնակ էր, բայց այսօր ունի խառը՝ հայ և մոլոկան բնակչություն։ Երկու գյուղերի արանքում հայաբնակ Մարգահովիտ գյուղն է։

Այս գյուղերը Հայաստանի ամենագեղատեսիլ վայրերից մեկում են՝ սարերի ու անտառների արանքում, որոնց միջով ձգվում է այստեղից սկիզբ առնող Աղստև գետը։

Այժմ Ֆիոլետովոն ամենամեծ մոլոկանաբնակ գյուղն է Հայաստանում ու նաև մոլոկանների հոգևոր կենտրոնը։

Միխայիլը և Նատալյան. գյուղում և գյուղից դուրս նրանց բոլորը գիտեն։ Ֆիոլետովոյում նրանք թեյարան են բացել և այցելուներն ինքնաեռով կամ սամովարով թեյ են հյուրասիրում։ Նատալյան նաև հրաշալի նրբաբլիթներ է թխում, որոնք մատուցում է չիչխանի և այլ ջեմերով։ Նրանց երեք զավակներն ու տասնմեկ թոռները Մոսկվայում ու Ստավրոպոլում են։ Ամռանը, երբ թոռները գալիս են գյուղ, վերադառնալ այլևս չեն ուզում։