Քուվեյթը հայտարարել է Բուբիյան կղզու վրա իրանական դրոնների հարձակման մասին

Քուվեյթի արտաքին գործերի նախարարությունը հայտարարել է, որ իրանական դրոններով հարձակում է իրականացվել երկրին պատկանող Բուբիյան կղզու և երկրի հյուսիսում գտնվող մի շարք կարևոր օբյեկտների վրա։

Գերատեսչության հաղորդմամբ՝ հարձակման թիրախում են եղել կառավարական շենքերից մեկը, ինչպես նաև Բուբիյան կղզում գործող ընկերություններից մեկին պատկանող քաղաքացիական ավտոմեքենաները։

«Դա Քուվեյթի պետության ինքնիշխանության աղաղակող խախտում է, ուղղակի սպառնալիք նրա անվտանգությանը և կայունությանը, ինչպես նաև միջազգային իրավունքի նորմերի, Միավորված ազգերի կազմակերպության կանոնադրության, բարիդրացիության սկզբունքների և Անվտանգության խորհրդի 2817 բանաձևի լուրջ խախտում է»,- նշված է Քուվեյթի ԱԳՆ հայտարարության մեջ։