Ռուսաստանի և Հայաստանի միջև ապրանքաշրջանառությունը 2025-ին կրճատվել է ավելի քան 30 %-ով և շարունակելու է կրճատվել․ օգոստոսի 6-ին ճեպազրույցի ժամանակ հայտարարել է Ռուսաստանի փոխվարչապետ Ալեքսեյ Օվերչուկը:
Ղրղզստանի Չոլպոն-Աթա քաղաքում ընթացող ռուս-ղրղզական տնտեսական ֆորումի շրջանակում, ՌԴ փոխվարչապետը նշել է, որ 2024-ին երկկողմ առևտրաշրջանառությունը հասել էր ռեկորդային ցուցանիշի՝ շուրջ 12 մլրդ դոլարի: Սակայն արդեն նախորդ տարի այն կրճատվել է՝ հասնելով մոտ 8 մլրդ դոլարի:
Օվերչուկի խոսքով՝ ընթացիկ տարում արձանագրվում է ապրանքաշրջանառության «չափազանց դրամատիկ անկում», որն այժմ կազմում է 2025-ի ծավալների ընդամենը մոտ երկու երրորդը:
«Մենք վերջին երեք-չորս տարիների ընթացքում Հայաստանի մեր գործընկերներին ասում էինք, որ նման ռիսկեր գոյություն ունեն, մասնավորապես՝ ապրանքաշրջանառության կրճատման ռիսկերը»,- ասել է Օվերչուկը։
Ռուսաստանցի բարձրաստիճան պաշտոնյան հավելել է, որ ստեղծված տնտեսական իրավիճակում ակնհայտ է երկու երկրների միջև առևտրային ցուցանիշների հետագա կրճատման միտումը:
Օգոստոսի 6-ին Ղրղզստանում մեկնարկել է Եվրասիական միջկառավարական խորհրդի նիստը, որին մասնակցում է նաև Հայաստանի վարչապետ Նիկոլ Փաշինյանը։
2026-ի խորհրդարանական ընտրությունների քարոզարշավին և դրանից հետո Ռուսաստանը Հայաստանի նկատմամբ սկսեց կիրառել տնտեսական ճնշումներ՝ հերթով սահմանափակելով հայկական ապրանքների մուտքը իր շուկա։
Ապրիլի վերջին ՌԴ սպառողների իրավունքների գործակալությունը՝ «Ռոսպոտրեբնադզորը», խնդիրներ գտավ «Ջերմուկ» հանքային ջրերում և սահմանափակեց ներմուծումը։ Ավելի ուշ սահմանափակումները տարածվեցին հայկական գյուղմթերքի, ծաղիկների, ալկոհոլային խմիչքների և այլ ապրանքների վրա։ Փորձագետները նշում են, որ այս պատժիչ քայլերը կապված են հունիսի 7-ին Հայաստանում կայանալիք խորհրդարանական ընտրությունների հետ, և Մոսկվան դրանով ցանկանում է հայ ընտրողներին կողմնորոշել քվեարկելու ռուսամետ թեկնածուների օգտին։
Պատմություններ
