ԵՊՀ ամբիոնի վարիչը խոշոր չափի կաշառք է վերցրել․ նա տնային կալանքի տակ է. ՀԿԿ

2023-ի սեպտեմբերի 3-ից Երևանի պետական համալսարանի պատմության ֆակուլտետի Հայոց պատմության ամբիոնի վարիչի պաշտոնը զբաղեցրած անձը, իր իշխանական և ծառայողական լիազորություններն օգտագործելով, ստացել է կաշառք, հայտնում են Հակակոռուպցիոն կոմիտեից:

Նախաքննությամբ պարզվել է, որ ուսանողների ընդունելության հանձնաժողովի վրա ունեցած ազդեցությունն օգտագործելու եղանակով, քաղաքացու՝ Երևանի պետական համալսարան ընդունելությունն անխոչընդոտ ապահովելու նպատակով, նրա ազգականից պահանջել է նախ 5.000 դոլար, այնուհետև սակարկության արդյունքում՝ 4.000 դոլար կաշառք:

Նախաքննության ընթացքում ԵՊՀ ամբիոնի վարիչին մեղադրանք է ներկայացվել խոշոր չափերով կաշառք ստանալու համար: Վերջինիս նկատմամբ որպես խափանման միջոց է կիրառվել տնային կալանքը։

Քրեական վարույթով նախաքննությունն ավարտվել է: Վարույթի նյութերը մեղադրական եզրակացությամբ ուղարկվել են Հակակոռուպցիոն դատարան:

Հակակոռուպցիոն կոմիտեի հրապարակած ձայնագրության մեջ հնչում է ԵՊՀ պատմության ֆակուլտետի Հայոց պատմության ամբիոնի վարիչ Էդիկ Մինասյանի անունը։ Նա նախկին պատգամավոր Արծվիկ Մինասյանի եղբայրն է։