Էլեկտրամոբիլների ներմուծման զրոյական մաքսատուրքով ևս 5000 քվոտա է սահմանվել

Այսօրվանից՝ օգոստոսի 21-ից, ուժի մեջ է մտնում էլեկտրական մեքենաների ներմուծման արտոնյալ պայմանների ընդլայնման որոշումը։ Համաձայն կառավարության որոշման՝ 2026-ի համար էլեկտրաշարժիչով ևս 5000 տրանսպորտային միջոց կներկրվի 0 տոկոս մաքսատուրքի դրույքաչափով։ Համապատասխան որոշումն ընդունվել է կառավարության օգոստոսի 20-ի նիստում։

Ներմուծվող 5000 միավոր քվոտայից ոչ ավելի, քան 4500-ը նախատեսվում է ֆիզիկական անձանց, անհատ ձեռնարկատերերի և այն իրավաբանական անձանց համար, որոնք չունեն անմիջապես ավտոարտադրողի հետ կնքված դիլերական-դիստրիբյուտորական պայմանագիր։ Մնացած 500-ից ոչ ավելի քանակը կհատկացվի բացառապես այն սուբյեկտներին, որոնք ունեն անմիջապես ավտոարտադրողի հետ կնքված դիլերական-դիստրիբյուտորական պայմանագիր, գործարանային երաշխիքային ու հետերաշխիքային տեխնիկական սպասարկման, ինչպես նաև գործարանային ծրագրային ապահովման պարտավորությունները հաստատող փաստաթղթեր և փակ տեխնիկական սպասարկման կայան։

Էկոնոմիկայի նախարարության մշակած այս նախագիծը պայմանավորված է Եվրասիական տնտեսական հանձնաժողովի խորհրդի հուլիսի 9-ի թիվ 79 որոշման դրույթների կատարման անհրաժեշտությամբ։ Համապատասխան նախագծի մեջ նշվում է, որ որոշումը լիովին համահունչ է շրջակա միջավայրի պահպանության և կանաչ տնտեսության խթանման պետական քաղաքականությանը։ Փաստաթղթի համաձայն՝ դրա իրականացումը լրացուցիչ ֆինանսական միջոցների ներգրավման անհրաժեշտություն չի առաջացնի և չի հանգեցնի պետական կամ տեղական ինքնակառավարման մարմինների բյուջեների եկամուտների ու ծախսերի փոփոխությունների։