Բանակում մահվան դեպք չի արձանագրվել․ ՊՆ-ն՝ շրջանառվող տեղեկությունների մասին

Բանակում մահվան դեպք չի արձանագրվել. Պաշտպանության նախարարությունը հերքում է շրջանառվող տեղեկությունը։

Այսօր լրատվամիջոցներում տեղեկություն էր տարածվել, թե ՊՆ N զորամասի պայմանագրային զինծառայողի են գտել իր տանը կախված վիճակում։

ՊՆ-ի փոխանցմամբ՝ նշված դեպքը տեղի է ունեցել մահացածի բնակության վայրում՝ անասնաֆերմայում։

«Մահացածն այդ պահին ծառայության մեջ չի գտնվել․ դեպքն առնչություն չունի ծառայության հետ և չի կարող որակվել որպես բանակում տեղի ունեցած պատահար»,- հայտնում են ՊՆ-ից։

ՊՆ-ն պահանջում է զերծ մնալ բանակի թիրախավորումից և խուսափել զինծառայողների ու նրանց ծնողների, հարազատների շրջանում անհարկի լարվածություն հարուցող գործելաոճից։

Վերջին տասը օրվա ընթացքում ոչ մարտական պայմաններում զինծառայողների մահվան երեք դեպք է արձանագրվել։

Օգոստոսի 13-ին ՊՆ-ն հայտնել էր զորամասերից մեկի զինծառայող Գրիգոր Զաքարյանի դին՝ հրազենային վնասվածքով հայտնաբերելու մասին։ Օգոստոսի 19-ին Ճամբարակ քաղաք տանող ավտոճանապարհին «Գազ-53» մակնիշի ավտոմեքենան վրաերթի էր ենթարկել մի քանի զինծառայողի։ Նրանցից մեկը՝ Սուրեն Մամբրեի Վարդանյանը, մահացել էր։ Օգոստոսի 23-ին էլ հայտնաբերվել էր ՊՆ N զորամասի զինծառայող Էդգար Գևորգի Գևորգյանի դին՝ հրազենային վնասվածքով։