Դատարանը Ստեփան Ասատրյանին պարտավորեցրել է հերքել Միքայել սրբազանի վերաբերյալ իր հայտարարությունները

Դատարանը բավարարել է Միքայել արքեպիսկոպոս Աջապահյանի հայցն՝ ընդդեմ Հովհաննավանքի նախկին հոգևորական Ստեփան Ասատրյանի(նախկինում՝ Տեր Արամ)։ Այս մասին հայտնում է Միքայել սրբազանի պաշտպանների թիմը։

Արարատի և Վայոց ձորի մարզերի առաջին ատյանի ընդհանուր իրավասության դատարանը պարտավորեցրել է Ստեփան Ասատրյանին վճիռն օրինական ուժի մեջ մտնելուց հետո հինգ օրվա ընթացքում հրապարակային հերքում տարածել։

Ասատրյանը պետք է «Հայկական ժամանակի» կայքում տեսաուղերձ հրապարակի և հայտարարի, որ 2026 թվականի հունվարի 22-ին հարցազրույցի ընթացքում Միքայել Աջապահյանի վերաբերյալ իր հնչեցրած տեղեկությունները չեն համապատասխանում իրականությանը։

Նա պետք է հերքի այն պնդումները, թե Աջապահյանը «տեռորիզմի մասին էր խրախուսում», «բանտից սպառնալիքներ էր հնչեցնում Հայաստանի Հանրապետության նկատմամբ», ինչպես նաև կին և աղջիկ ունի։

Դատարանը նաև որոշել է Ստեփան Ասատրյանից հօգուտ Միքայել արքեպիսկոպոս Աջապահյանի բռնագանձել 1 մլն դրամ՝ որպես զրպարտության համար փոխհատուցում։