Դատարանը որոշեց ևս երկու ամսով երկարացնել գործարար Գագիկ Ծառուկյանի կալանքը։ Այս մասին լրագրողներին հայտնեց փաստաբան Էմին Խաչատրյանը։
«Որոշումը բողոքարկելու ենք Վերաքննիչ դատարանում»,- ասաց փաստաբանը։
Ըստ փաստաբանի՝ մեղադրող կողմի ներկայացրած նյութերից որևէ հանգամանք չի հաստատում, որ Գագիկ Ծառուկյանն ազատության մեջ մնալով կարող է խանգարել գործի քննությանը։
«Այս փուլում խափանման միջոց կիրառելու անհրաժեշտություն չկար։ Այս փուլում բավականին շատ գործողություններ արդեն կատարվել են, բոլոր առերեսումներն ավարտվել են»,- ասաց փաստաբանը։
ԲՀԿ առաջնորդ, գործարար Գագիկ Ծառուկյանը երկու ամսով կալանավորվել էր հուլիսի 7-ին։
Հուլիսի 6-ի երեկոյան «Բարգավաճ Հայաստան» կուսակցության առաջնորդը ձերբակալվել էր։ Ըստ Քննչական կոմիտեի՝ նա կասկածվում է առանձնապես խոշոր չափերով խարդախություն և փողերի լվացում կազմակերպելու մեջ։
Գործը վերաբերում է Հայաստան-Իրան առևտրային գործարքներին, որոնց շրջանակում, ըստ քննության, հափշտակվել է շուրջ 21 մլն դոլարի գույք։
Պատմություններ
