Հոդվածի թարգմանությունը՝ OC Media-ի հետ համագործակցության շրջանակում։
Ադրբեջանի Ընտրությունների մոնիթորինգի և ժողովրդավարության ուսումնասիրությունների կենտրոնի նախկին ղեկավար Անար Մամեդլին դատապարտվել է 13 տարվա ազատազրկման՝ 2024-ի ապրիլին ձերբակալվելուց ավելի քան երկու տարի անց։ Գործով մյուս մեղադրյալ Անար Աբդուլաևը դատապարտվել է 12 տարվա ազատազրկման։
Մամեդլիի և Աբդուլաևի նկատմամբ դատավճիռը սեպտեմբերի 7-ին կայացրել է դատավոր Այգյուն Գուրբանովան։
Մամեդլին ձերբակալվել էր մաքսանենգության մեղադրանքով՝ անկախ Abzas Media լրատվամիջոցի դեմ հարուցված գործի շրջանակում։ Հետագայում մեղադրանքներին ավելացվեցին ֆինանսական հանցագործություններին վերաբերող մի շարք հոդվածներ, այդ թվում՝ արժույթի մաքսանենգություն, ապօրինի ձեռնարկատիրություն, հարկերից խուսափում, փաստաթղթերի կեղծում և փողերի լվացում։
Մամեդլիին ձերբակալեցին և մեղադրանք առաջադրեցին 2024-ի ապրիլին։ Նա հերքում է մեղադրանքները, իսկ միջազգային իրավապաշտպան կազմակերպությունները, այդ թվում՝ ՄԱԿ-ը, նրան քաղբանտարկյալ են համարում։
Human Rights House Foundation-ի տնօրեն Մարիա Դալեն, մեկնաբանելով դատավճիռը, այն անվանել է «խոր վշտի և խայտառակության օր» և կոչ արել անհապաղ ազատ արձակել Մամեդլիին։
«Կասկած չկա, թե ինչ է այս դատավճիռը՝ պատիժ Մամեդլիի անկախ և օրինական աշխատանքի համար՝ մարդու իրավունքների պաշտպանության, ընտրությունների մոնիթորինգի և իր երկրում ժողովրդավարության առաջմղման ուղղությամբ։ Նրա դեմ բոլոր մեղադրանքները քաղաքական դրդապատճառներ ունեն, իսկ դատապարտումը Ադրբեջանի իշխանությունների ակնհայտ վրեժխնդրությունն է»։
Amnesty International-ի՝ Արևելյան Եվրոպայի և Կենտրոնական Ասիայի հարցերով տնօրեն Մարի Ստրութերսը հայտարարել է, որ դատավճիռը ցույց է տալիս, թե ինչպես են «լրագրողները և մյուս քննադատները, որոնք բացահայտում են իշխանությունների չարաշահումները և մարտահրավեր նետում նախագահ Իլհամ Ալիևի ընտանիքի շահերին, խստորեն պատժվում»։ Նա նշել է, որ 2009-ից իշխանությունները «ավելի ու ավելի են խստացրել սահմանափակումները քննադատական ՀԿ-ների և անկախ լրատվամիջոցների նկատմամբ»։
«Խոսքի ազատության նկատմամբ աճող սահմանափակումների պայմաններում բազմաթիվ կազմակերպություններ ռազմավարություններ են մշակել՝ իրենց օրինական աշխատանքը շարունակելու համար։ Սակայն իշխանությունները փորձել են քրեականացնել այդ ջանքերը՝ սահմանելով ծանր հարկային, դրամային և այլ կարգավորող պահանջներ, որոնք նախատեսված են նրանց գործունեությունը խոչընդոտելու համար»,- նշել է նա։
2026-ի մայիսին Խաղաղության և ժողովրդավարության ինստիտուտը հայտարարել էր, որ Ադրբեջանում կա 328 «քաղբանտարկյալ»։
2025-ի հունիսին Ադրբեջանում Abzas Media-ի կալանավորված աշխատակիցներին երկարատև ազատազրկման դատապարտեցին՝ յոթուկեսից մինչև ինը տարի ժամկետով։
Պատմություններ
