Չինաստանը պատրաստ է պաշտպանել Իրանի շահերը. ԱԳ նախարար

«Չինաստանը պատրաստ է համագործակցության և երկխոսության զարգացման միջոցով պաշտպանել Իրանի շահերն ու իրավունքները». այդ մասին սեպտեմբերի 16-ին հայտարարել է Չինաստանի արտգործնախարար Վան Լին Իրանի իր պաշտոնակից Աբբաս Արաղչիի հետ հանդիպմանը։ Երկու երկրների արտգործնախարարների հանդիպումը տեղի է ունեցել Պեկինում՝ Իրանի արտգործնախարարի մեկօրյա այցի շրջանակում։

Ըստ իրանական IRNA գործակալության՝ Չինաստանի գլխավոր դիվանագետը հայտարարել է, որ Իրանի ու ԱՄՆ-ի միջև հակամարտությունը չի բխում երկու երկրների, ինչպես նաև միջազգային հանրության շահերից, և կոչ է արել Թեհրանին ու Վաշինգտոնին վերադառնալ բանակցային սեղան՝ ապավինելով «Իսլամաբադի համաձայնություններին»։

«Որպես ՄԱԿ-ի Անվտանգության խորհրդի մշտական ​​անդամ՝ Չինաստանը պատրաստ է կառուցողական դեր խաղալ միջազգային վեճերի լուծման գործում», նշել է Վան Լին։ Ըստ չինացի բարձրաստիճան պաշտոնյայի՝ Պեկինը նաև պատրաստ է նպաստելու Իրանի և տարածաշրջանի արաբական երկրների միջև երկխոսությանը։

Ըստ միջազգային աղբյուրների՝ Իրանի արտգործնախարար Աբբաս Արաղչին իր հերթին հայտարարել է, որ Թեհրանը հետաքրքրված չէ Միացյալ Նահանգների հետ հակամարտությամբ և պատրաստ է վերադառնալ բանակցային սեղանի շուրջ։

Իրանի արտգործնախարար Աբբաս Արաղչիի Չինաստան կատարած այցը միջազգային մամուլի կենտրոնական թեմաներից է։ Իրանի գլխավոր դիվանագետը Միացյալ Նահանգների հետ պատերազմի ընթացքում երկրորդ անգամ է Պեկին մեկնում․ նախորդ անգամ նա Չինաստանի մայրաքաղաք էր այցելել մայիսին։

Արաղչիի երկու այցերը Չինաստան ժամանագրորեն համընկնում են Պեկին-Վաշինգտոն բարձր մակարդակի բանակցություններին։ Մայիսին Արաղչին Չինաստան էր մեկնել, երբ դրանից օրեր առաջ Պեկինում էր ԱՄՆ նախագահ Դոնալդ Թրամփի գլխավորած պատվիրակությունը։ Իսկ այս անգամ՝ սեպտեմբերի վերջին, սպասվում է Չինաստանի առաջնորդ Սի Ծինփինի՝ պատասխան այցը Վաշինգտոն։

Պեկին-Վաշինգտոն բանակցությունների գլխավոր թեմաներից մեկը վերաբերում է Միացյալ Նահանգներ-Իրան հակամարտությանն ու Մերձավոր Արևելքի կայունությանը։ Չինաստանը ձգտում է հասնել Հորմուզի նեղուցի ապաշրջափակմանն ու նրա անխափան աշխատանքին, քանզի ջրային այդ անցումը մեծ ազդեցություն ունի նաև Չինաստանի տնտեսության վրա։ Իրանական նավթի ամենամեծ գնորդը Չինաստանն է։

Խաղաղ պայմաններում Հորմուզի նեղուցով է անցնում համաշխարհային նավթագազյաին պաշարների արտահանման ⅕-րդը՝ մոտ 20 տոկոսը։