Վերջին մեկ շաբաթում Իրանն ուժեղացրել է հարձակումները Պարսից ծոցում ամերիկյան ռազմական թիրախների և նավագնացության վրա։ Միևնույն ժամանակ ԱՄՆ ծովային շրջափակումն ու նոր պատժամիջոցներն ավելի ու ավելի են հարվածում իրանական տնտեսությանը։
Al Jazeera-ի տվյալներով՝ նոյեմբերի 14-ից ի վեր Հորմուզի նեղուցում և դրա շրջակայքում հարված է ստացել առնվազն 25 լցանավ։ Նեղուցով է անցնում աշխարհի նավթի ու գազի մոտ մեկ հինգերորդը։
Հարձակումների հիմնական թիրախը Բահրեյնն է եղել։ Շաբաթ օրը Մանաման հայտնել է, որ իրանական հարվածը խոցել է քաղաքացիական արդյունաբերական օբյեկտ և հրդեհ առաջացրել։ Իսլամական հեղափոխության պահապանների կորպուսը (ԻՀՊԿ) հայտարարել է, որ թիրախավորել է ամերիկյան դիրքերը ալ-Ռիֆայի և Ավալիի ռազմաբազաներում և ոչնչացրել Patriot հակաօդային պաշտպանության երկու ռադար։ ԻՀՊԿ-ն գործողությունը որակել է որպես պատասխան Իրանի Հենգամ կղզում ռադարային կայանի վրա ԱՄՆ հարվածին։
Կիրակի իրանական ուժերը հայտարարել են, որ խոցել են ևս մեկ ամերիկյան MQ-1 անօդաչու։ ԻՀՊԿ-ի պնդմամբ՝ դա այդ տեսակի 20-րդ անօդաչուն է, որը խոցվել է փետրվարի վերջին պատերազմի սկսվելուց ի վեր։ ԱՄՆ Կենտրոնական հրամանատարությունն իր հերթին հերքել է իրանական բանակի պնդումը, թե այն վնասել է ամերիկյան F-16 կործանիչը Պարսից ծոցի վրա։
Հորմուզով նավագնացությունը կտրուկ նվազել է։ Մեծ Բրիտանիայի Ծովային առևտրային գործողությունների կենտրոնի (UKMTO) տվյալներով՝ նոյեմբերի 12-18-ը նեղուցով անցել է 263 նավ, ինչը նախորդ շաբաթվանից 15 տոկոսով պակաս է։ Մինչև պատերազմը նեղուցով օրական անցնում էր մոտ 135 նավ։ Նավթի գինը մեկ բարելի համար անցել էր 100 դոլարը, ապա կայունացել է մոտ 83 դոլարի սահմաններում։
Իրանի նախագահ Մասուդ Փեզեշքիանը հայտարարել է, որ իր երկիրը կանգնած է «լուռ տնտեսական պատերազմի» առջև։ Արտաքին գործերի փոխնախարար Քազեմ Ղարիբաբադին շրջափակումը որակել է թշնամական քայլ։ Նրա խոսքով՝ Թեհրանը «կձեռնարկի ցանկացած անհրաժեշտ միջոց՝ այս տնտեսական պաշարումը ճեղքելու համար»։
ԱՄՆ նախագահ Դոնալդ Թրամփը շաբաթ օրը հայտարարել է, որ ցանկանում է Իրանի հետ «մշտական» համաձայնություն, որը թույլ չի տա նրան միջուկային զենք ձեռք բերել։
Al Jazeera-ի հետ զրույցում Պատասխանատու պետական կառավարման Քուինսի ինստիտուտի գործադիր փոխնախագահ Թրիտա Փարսին նշել է, որ ճնշումը շարունակելու դեպքում Վաշինգտոնը նոր բախումների վտանգ կունենա։ «Եթե նա շարունակի շրջափակումը, էսկալացիա կլինի»,- ասել է Փարսին։












