Թուրքիան աջակցում է Հայաստանի և Ադրբեջանի միջև խաղաղության գործընթացին. Ֆիդան

Թուրքիան աջակցում է Հայաստանի և Ադրբեջանի միջև խաղաղության գործընթացին։ Այս մասին հայտարարել է Թուրքիայի արտգործնախարար Հաքան Ֆիդանը Նյու Յորքում՝ «Թուրքիա-ԱՄՆ հարաբերությունները՝ 100-ամյակին ընդառաջ» խորագրով քննարկման ժամանակ, հայտնում է Daily Sabah-ը։

Խոսելով Թուրքիայի և Միացյալ Նահանգների համագործակցության հնարավոր ուղղությունների մասին՝ Ֆիդանը նշել է, որ երկու երկրները կարող են խորացնել փոխգործակցությունը նաև Հարավային Կովկասում։

Նրա խոսքով՝ Անկարան աջակցում է Հայաստանի և Ադրբեջանի միջև խաղաղության գործընթացին։ Ֆիդանը Հարավային Կովկասը հիշատակել է այն տարածաշրջանների թվում, որտեղ թուրք-ամերիկյան ավելի սերտ համակարգումն ու դիվանագիտական համագործակցությունը կարող են նպաստել կայունության ամրապնդմանը։

Թուրքիայի արտգործնախարարը նշել է, որ Անկարան և Վաշինգտոնը կարող են ընդլայնել համագործակցությունը նաև Սև ծովի տարածաշրջանում, Ուկրաինայում և Բալկաններում։

Ֆիդանի խոսքով՝ Թուրքիայի և ԱՄՆ-ի հարաբերությունները վերջին շրջանում նոր թափ են ստացել, և երկու երկրները պետք է այդ հնարավորությունն օգտագործեն առկա խնդիրները լուծելու և համագործակցությունն ավելի ինստիտուցիոնալ դարձնելու համար։