Ռուսաստանը պահպանում է հայկական ձկնամթերքի և կաթնամթերքի ներմուծման արգելքը

Ռուսաստանը շարունակում է արգելքը Հայաստանից ձկնամթերքի և կաթնամթերքի ներմուծման նկատմամբ։ Ինչպես ՏԱՍՍ-ին հայտնել են «Ռոսսելխոզնադզորից», ռուսական կողմը պնդում է, թե հայկական կողմից չեն ստացվել արտադրության ընթացքում արձանագրված խախտումների վերացումը հաստատող փաստաթղթեր։

Ըստ ռուսական գերատեսչության՝ Հայաստանի տեսչական մարմնից ստացվել են միայն երաշխիքներ և միջնորդագրեր, ինչը, նրանց գնահատմամբ, բավարար չէ սահմանափակումները հանելու համար, և համապատասխան տեղեկատվությունն ուղարկվել է հայկական կողմին։

Ռուսաստանը երկար տարիներ եղել է հայկական ձկնաբուծության հիմնական արտահանման շուկան։ 2025-ին Հայաստանից արտահանվել է շուրջ 80 մլն դոլարի ձուկ և ձկնամթերք, որի շուրջ 98 տոկոսը բաժին է ընկել Ռուսաստանին։ Ռուսաստան է արտահանվել շուրջ 10,000 տոննա արտադրանք։

Ռուսաստանն ամիսներ առաջ Հայաստանի նկատմամբ սկսեց կիրառել տնտեսական ճնշումներ՝ հերթով սահմանափակելով հայկական մի շարք ապրանքների մուտքն իր շուկա և իր տարածքով ԵԱՏՄ մյուս երկրներ։