Սիրանուշ Ադամյան
Amazon-ը պատրաստ է Հայաստանում ներդրումներ կատարել, եթե ապահովվի ընկերության համար անհրաժեշտ շուրջօրյա կայուն էլեկտրամատակարարումը, հայտարարել է վարչապետ Նիկոլ Փաշինյանը՝ «Ինֆոքոմի» հետ երեքշաբթի հրապարակված հարցազրույցում։
Փաշինյանը հղում է արել բարձր տեխնոլոգիական արդյունաբերության նախարարից այդ առավոտ ստացած նամակին։
«Amazon-ը պատրաստ է Հայաստանում ներդրումներ անել, բայց իրեն 1000 մեգավատանոց կայան է պետք։ Ասում է՝ եթե դուք կասեք, որ 1000 մեգավատանոց կայան կլինի, ես Հայաստանում համապատասխան չափի ներդրումներ կանեմ»,– ասել է վարչապետը։
Նա չի հստակեցրել հնարավոր ներդրումների չափը, նախագծի բնույթը կամ իրականացման ժամկետները։
Հաղորդավարի հարցին՝ արդյոք պահանջարկը հնարավոր է բավարարել արևային կայանով, Փաշինյանը պատասխանել է, որ ընկերությանը շուրջօրյա կայուն էներգամատակարարում է անհրաժեշտ։ Այդ համատեքստում նա խոսել է ատոմակայանի, էներգիայի կուտակիչների և հողմային կայանների անհրաժեշտության մասին։
Վարչապետի խոսքով՝ Հայաստանում արհեստական բանականության ոլորտում արդեն հաստատված նախագծերի էներգետիկ պահանջարկը գերազանցում է երկրի առկա կարողությունները։ Նա նոր ներդրումային ծրագրերով է բացատրել ավելի մեծ հզորությամբ ատոմակայան կառուցելու նկատմամբ կառավարության աճող հետաքրքրությունը։
Փաշինյանը նախկինում խոսում էր Հայաստանում փոքր մոդուլային ռեակտորով ատոմակայան կառուցելու տարբերակների մասին։ Հոկտեմբերի 1-ին, սակայն, նա հայտարարեց, որ 1000 մեգավատ հզորությամբ ատոմակայանը կարող է առավել տրամաբանական լուծում լինել Հայաստանի համար։ Դրանից երկու օր առաջ «Ռոսատոմի» գլխավոր տնօրեն Ալեքսեյ Լիխաչովը Երևանում ներկայացրել էր նոր ատոմակայանի կառուցման ռուսական առաջարկները։
Հայաստանում ՄԱԿ-ի էներգետիկայի ազգային փորձագետ Արա Մարջանյանը ՍիվիլՆեթի հետ զրույցում գնահատել էր, որ Ռուսաստանն այժմ ունի ինժեներական և տնտեսական առումով առավել մշակված առաջարկ։ Նրա խոսքով՝ Հայաստանը պետք է ընտրի փորձարկված տեխնոլոգիա, որը հնարավոր կլինի գործարկել մինչև 2036–2037 թվականները։
Գործող Մեծամորի ատոմակայանի շահագործումը նախատեսված է մինչև 2036 թվականը։ Կառավարությունը նոր կայանի տեխնոլոգիայի ընտրության վերջնաժամկետ է սահմանել 2027 թվականի ավարտը։
Միաժամանակ Փաշինյանը հարցազրույցում ընդգծել է, որ վերականգնվող էներգետիկայի զարգացումը շարունակում է առաջնահերթություն մնալ։ Կառավարության նպատակը, ըստ նրա, ոչ միայն աճող ներքին պահանջարկը բավարարելն է, այլև էլեկտրաէներգիա արտահանելը։
Պատմություններ
