Դատախազությունը պահանջում է բռնագանձել «Այրարատ» կինոթատրոնի շենքը

Գլխավոր դատախազությունը դիմել է Հակակոռուպցիոն դատարան՝ պահանջելով բռնագանձում տարածել Երևանի Տիգրան Մեծի պողոտա 16 հասցեում գտնվող նախկին «Այրարատ» («Ռոսիա») կինոթատրոնի անշարժ գույքի վրա, որը կապվում է Ազգային ժողովի նախկին ՔՊ-ական պատգամավոր Խաչատուր Սուքիասյանի հետ։

Սեպտեմբերի 29-ին ներկայացված հայցադիմումն ուղղված է Պետական գույքի կառավարման կոմիտեի, ինչպես նաև մասնավոր ՍՊ և ՓԲ ընկերությունների դեմ։ Դատախազության պահանջի հիմքում ընկած է այն հանգամանքը, որ մասնավորեցման գործարքով սահմանված՝ 1,5 մլն դոլարին համարժեք դրամի ներդրումները մինչև 2017-ի հունվարի 14-ը չեն կատարվել։

Հակակոռուպցիոն դատարանը հոկտեմբերի 5-ի որոշմամբ հայցադիմումն ընդունել է վարույթ և կիրառել հայցի ապահովման միջոց․ պատասխանող ՍՊ ընկերությանն արգելվել է կատարել նշված գույքի փաստացի կամ իրավական վիճակի փոփոխությանը հանգեցնող որևէ գործողություն։