«Դուք պատկերացնո՞ւմ եք՝ հիմա փաստացի պատերազմ է Իրանի և ԱՄՆ-ի միջև, բայց TRIPP-ն անցնելու է ընդամենը 15 մետր հեռավորության վրա Իրանի սահմանից»,- հայտարարել է Հայաստանի Անվտանգության խորհրդի քարտուղար Ալեն Սիմոնյանը՝ «Խաղաղություն, անվտանգություն և տարածաշրջանային փոխակերպվող իրողություններ» թեմայով պանելային քննարկման ժամանակ։
Նոյեմբերի 6-ին կայացած քննարկմանը նա նշել է, որ նախագծի նշանակությունը պետք է դիտարկել ոչ միայն Հայաստանի, այլև Իրանի, ԱՄՆ-ի և ամբողջ տարածաշրջանի տեսանկյունից։
ԱԽ քարտուղարը բացառել է, որ TRIPP-ը կարող է օգտագործվել Իրանի դեմ կամ դառնալ ամերիկյան ռազմական ներկայության հենակետ։
«Մենք երբեք չենք մտնի որևէ գործընթացի մեջ Իրանի դեմ, մեր հարևաններից որևէ մեկի դեմ։ Դա մեր քաղաքական դիրքորոշումն է»,- հայտարարել է նա։
Սիմոնյանի խոսքով՝ TRIPP-ը տնտեսական նախագիծ է և չի նախատեսում զինվորական ներկայություն։
ԱԽ քարտուղարը նաև պարզաբանել է, որ նախագիծը չի սահմանափակվում միայն Սյունիքով անցնող երկաթուղով։ Ըստ նրա՝ TRIPP-ի շրջանակում նախատեսվող այլ ենթակառուցվածքներ, այդ թվում՝ էլեկտրահաղորդման գծեր կամ գազատարներ, կարող են անցնել Հայաստանի այլ հատվածներով։
«Թրամփի ուղի՝ հանուն միջազգային խաղաղության և բարգավաճման» (TRIPP/Trump Route for International Peace and Prosperity) նախագիծը բխում է 2025 թվականի օգոստոսի 8-ին Վաշինգտոնում ԱՄՆ նախագահ Դոնալդ Թրամփի մասնակցությամբ ձեռք բերված հայ-ադրբեջանական պայմանավորվածություններից։ Այն նախատեսում է Հայաստանի տարածքով տարանցիկ կապ ապահովել Ադրբեջանի հիմնական մասի և Նախիջևանի միջև՝ միաժամանակ ընդլայնելով Հայաստանի միջազգային ու ներպետական հաղորդակցությունները։
2026 թվականի մայիսին հրապարակված հայ-ամերիկյան շրջանակային համաձայնագրով ամրագրված է, որ Հայաստանը պահպանում է լիակատար ինքնիշխանությունն ու իրավազորությունը իր տարածքում ԹՐԻՓՓ-ի իրականացման բոլոր գոտիների նկատմամբ։
Պատմություններ
