Գլխավոր Լրահոս

Հայաստանը չի ընդունում Բաքվի մոտեցումը․ Ռուբինյան

Հայաստանը չի ընդունում Բաքվի մոտեցումը․ Ռուբինյան

Հայաստանը չի ընդունում խաղաղության պայմանագրի ստորագրումը նոր Սահմանադրության ընդունմամբ պայմանավորելու Ադրբեջանի մոտեցումը և պատրաստ է համաձայնագիրը ստորագրել հենց այսօր։ Այս մասին նոյեմբերի 17-ին Ազգային ժողովում լրագրողների հետ ճեպազրույցում հայտարարել է ԱԺ նախագահ Ռուբեն Ռուբինյանը։

«Մենք չենք ընդունում այդ մոտեցումը։ Մենք համարում ենք, որ որևէ խոչընդոտ չկա խաղաղության պայմանագրի ստորագրման, և հենց այսօր էլ պատրաստ ենք ստորագրել խաղաղության պայմանագիրը»,- ասել է Ռուբինյանը։

ԱԺ նախագահի խոսքով՝ նոր Սահմանադրություն ընդունելու նախաձեռնությունը բխում է Հայաստանի ներքին օրակարգից։ Միաժամանակ նա չի բացառել, որ դրա ընդունումը կարող է նաև արտաքին քաղաքական հետևանքներ ունենալ։

Ռուբինյանն անդրադարձել է ընդդիմության հարցադրումներին, թե արդյոք Սահմանադրության փոփոխությունից հետո Ադրբեջանը կստորագրի խաղաղության պայմանագիրը և նոր նախապայմաններ չի ներկայացնի։

Նրա խոսքով՝ իշխանությունն այդ հարցերը տրամաբանական է համարել, իսկ վարչապետ Նիկոլ Փաշինյանը հայտնել է դրանց շուրջ մտածելու և ընդդիմությանն առաջարկ ներկայացնելու մտադրության մասին։

«Եթե հավելյալ երաշխիքներ են պետք, գուցե արժի գնալ այդ երաշխիքների հետևից՝ ձեր առաջ բերած օրակարգի հարցի շուրջ»,- ասել է Ռուբինյանը։

Ադրբեջանը Հայաստանի Սահմանադրության փոփոխությունը շարունակում է կապել խաղաղության պայմանագրի ստորագրման հետ։ Բաքուն առարկում է գործող Սահմանադրության նախաբանում Անկախության հռչակագրին արված հղմանը։ Հռչակագրում հիշատակվում է Հայաստանի և Լեռնային Ղարաբաղի վերամիավորման մասին 1989 թվականի դեկտեմբերի 1-ի որոշումը։ Երևանը պնդում է, որ Հայաստանի գործող Սահմանադրությունը տարածքային պահանջներ չի պարունակում։

Նոյեմբերի 7-ին վարչապետ Նիկոլ Փաշինյանը հայտարարել էր, որ Ադրբեջանն ընդունում է՝ Հայաստանի Սահմանադրությունը երկրի ներքին գործն է։ Նրա խոսքով՝ Իլհամ Ալիևն իր հետ զրույցներում ընդունել է դա, սակայն ադրբեջանական կողմը գործող սահմանադրական կարգավորումների պայմաններում չի ցանկանում ստորագրել և վավերացնել խաղաղության համաձայնագիրը։

«Ադրբեջանը Հայաստանից սահմանադրության փոփոխություն չի պահանջում, և Ադրբեջանը Հայաստանից սահմանադրության փոփոխություն պահանջել չի կարող»,- ասել էր Փաշինյանը։

Հայաստանում միաժամանակ ընթանում է նոր Սահմանադրության մշակման գործընթացը։ Նոյեմբերի 2-ին Փաշինյանը հայտնել էր, որ նախագիծը նախատեսվում է հրապարակել նոյեմբերին, որից հետո կմեկնարկեն հանրային քննարկումները։

Հոկտեմբերի 30-ին Ռուբինյանն առաջարկել էր ընդդիմությանը չխոչընդոտել Սահմանադրության նախագիծը հանրաքվեի դնելուն, այնուհետև գլխավորել «Ոչ»-ի շտաբը և հանրությանը ներկայացնել իր փաստարկները։

Հայաստանն ու Ադրբեջանը խաղաղության համաձայնագիրը նախաստորագրել են 2025-ի օգոստոսի 8-ին՝ Վաշինգտոնում։ Փաստաթղթի համաձայնեցված տեքստը հրապարակվել է օգոստոսի 11-ին, սակայն համաձայնագիրը մինչ օրս չի ստորագրվել։

Հետևեք մեզ Telegram-ում Telegram

Կարդալ ավելին

Տեղեկագիր

Բաժանորդագրվեք մեր տեղեկագրին և առաջինը ստացեք մեր շաբաթական ամփոփումները

Բաժանորդագրվելով Դուք տալիս եք համաձայնություն մեր համար։

EFCSNIFCNJTI

ՍիվիլՆեթն արգելում է օգտագործել իր հոդվածներն ու լուսանկարներն առանց պատշաճ հղման, ներբեռնել և առցանց այլ հարթակներում վերբեռնել իր պատրաստած և տարբերանշանը կրող տեսանյութերը։ ՍիվիլՆեթի տեսանյութերի մասնակի օգտագործումը կարող է լինել միայն ՍիվիլՆեթի գիտությամբ և համաձայնությամբ։

FacebookLogoInstagramLogoTiktokLogoTwitterLogoTelegramLogoYoutubeLogoMailLogo

Արդենի պողոտա 315, գրասենյակ 30 Գլենդել, Կալիֆոռնիա 91203

+1(818)749-450 [email protected]

Հյուսիսային պողոտա 1, գրասենյակ 30 Երևան 0010, Հայաստան

+374(10)500-119

CIVILNET © 2011-2026։ Բոլոր իրավունքները պաշտպանված են։

Մշակված է՝ -ում