Նոյեմբերի 20-ին Գերմանիայի 73 քաղաքում երիտասարդները բողոքի ակցիաներ են անցկացրել՝ պահանջելով կրթության ֆինանսավորման ավելացում, սոցիալական պայմանների բարելավում և կլիմայի պաշտպանությանն ուղղված քայլեր, հաղորդում է Reuters-ը։
«Gen Z regelt» շարժման նախաձեռնած ցույցերը Եվրոպայում երիտասարդական բողոքի նոր ալիքի մաս են։ Կազմակերպիչների տվյալներով՝ նոյեմբերի 20-ին երիտասարդական բողոքի ակցիաներ են անցկացվել նաև աշխարհի այլ երկրներում։ Ընդհանուր առմամբ, ցույցերն ու գործադուլներն ընդգրկել են առնվազն 25 երկիր, այդ թվում՝ Իտալիան, Իսպանիան, Մեծ Բրիտանիան և Ֆրանսիան։
Ցուցարարները դեմ են կրթության և սոցիալական ծառայությունների ֆինանսավորման կրճատումներին, կյանքի թանկացմանը և պարտադիր զինվորական ծառայության հնարավոր վերականգնմանը։ Նրանք պահանջում են նաև աշխատավարձերի բարձրացում և պետական ծառայությունների բարելավում։
Քյոլնում բողոքի ակցիային մասնակցող ուսանողուհի Յասմին Համադին Reuters-ին ասել է, որ դժգոհ է համալսարաններում, դպրոցներում և ընդհանրապես կրթական համակարգում իրականացվող կրճատումներից։ Նրա խոսքով՝ երիտասարդները փողոց են դուրս եկել փոփոխությունների հասնելու համար, քանի որ ստեղծված իրավիճակն այլևս չի կարող շարունակվել։











