Civilnet
Սահմանադրական դատարանն այսօր շարունակեց նախագահի նախկին թեկնածուներ Րաֆֆի Հովհաննիսյանի և Անդրիաս Ղուկասյանի հայցերի քննությունը՝ նախագահական ընտրությունների արդյունքները չեղյալ հայտարարելու պահանջով:
Նիստի առաջին կեսին դատարանը քննեց Ղուկասյանի հայցը, որի համար հիմք է հանդիսացել ռոք երաժիշտ Սերժ Թանգյանին ուղղված նախագահ Սերժ Սարգսյանի պատասխան նամակը, որում վերջինս նշում է, որ «ընտրություններն ինքն է կազմակերպել»:
Դատարանը մատնանշեց, որ Ղուկասյանի բերած փաստարկներն ու դիմումում ներկայացված փաստերը հիմնված են կասկածների վրա և կոնկրետ ապացույցներ չունեն: Համաձայն Սահմանադրության` դատարանում ներկայացված տեղեկություններն արժանահավատ լինելու համար պետք է ապացուցողական բնույթ ունենան:
ՍԴ-ն նշեց, որ հայցի քննությանը դեռ երկու օր կա, որի ընթացքում Ղուկասյանը կարող է իր դիմումը վերածել փաստարկված փաստաթղթի:
Անդրադառնալով Սերժ Սարգսյանի նամակին` դատարանը հարցրեց Ղուկասյանին, թե հնարավոր չէ արդյոք, որ նախագահը պատկերավոր խոսք է օգտագործել` ասելով «ընտրությունների կազմակերպում»: Ղուկասյանը սակայն բացառեց, որ Սերժ Սարգսյանը տեղյակ չէ իր արած հայտարարության իրավական իմաստներից: Նրա համոզմամբ` ամբողջ նամակի իմաստն այն է, որ նախագահն ազգային անհրաժեշտությունն օրենքից բարձր է դասում և նշում, որ «ներքին թշնամին չպետք է գա իշխանություն, որ չլինեն ականներ, պատերազմ և պարտություն»: Ղուկասյանը նշեց, որ իր այս հարցերին միայն Սերժ Սարգսյանը կարող է հստակ պատասխանել` պահանջելով գործի քննությանը վերջինիս ներգրավվել որպես վկա:
Նշենք, որ Սերժ Սարգսյանի շահերը ՍԴ-ում ներկայացնում են արդարադատության նախարար Հրայր Թովմասյանը և ԱԺ պետաիրավական հարցերի հանձնաժողովի նախագահ Դավիթ Հարությունյանը: Անդրիաս Ղուկասյանն ինքն է ներկայացնում իր հայցադիմումը:
Րաֆֆի Հովհաննիսյանի շահերը ՍԴ-ում ներկայացնում են փաստաբան Կարեն Մեժլումյանը և ԱԺ պատգամավոր Զարուհի Փոստանջյանը:
Պատմություններ
