Արգելվել է Apple-ի սմարթֆոնների և պլանշետների ներմուծումը ԱՄՆ

ԱՄՆ Միջազգային առևտրի հանձնաժողովը արգելել է ամերիկայն Apple ընկերության iPhone 4, iPhone 3GS սմարթֆոնների և iPad 2 ու  iPad 3G  պլանշետների ներմուծումը ԱՄՆ, հաղորդում է Reuters-ը: Հանձնաժողովը իր որոշումը պայմանավորել է հանգամանքով, որ Apple-ը նախագծման ժամանակ խախտել է հարավկորեական Samsung Electronics-ի արտոնագրային իրավունքը: Apple-ի սմարթֆոններն ու պլանշետները արտադրվում են Չինաստանում, և հանձնաժողովի որոշումը կորպորացիային, ըստ էության, զրկում է իր արտադրանքը ԱՄՆ-ում վաճառելու հնարավորությունից: Որոշումը, որը Apple-ի համար տեսականորեն ենթադրում է նաև բազմամիլիարդանոց վնասներ, նախագահ Բարաք Օբաման 60 օրում կարող է չեղյալ հայտարարել: Մի շարք փորձագետների խոսքով՝ Օբամայի վարչակազմը դեմ է այդպիսի արգելքներին: Ավելին՝ հունիսի 4-ին Սպիտակ տունը հանձնաժողովի լիազորությունները սահմանափակող օրենսդրական նախագիծ է ուղարկել Կոնգրես: Apple-ը հայտարարել է, որ հիասթափված է հանձնաժողովի որոշումից և ամեն ինչ անելու է դրա վերանայման համար: Հանձնաժողովի՝ հօգուտ Samsung-ի որոշումն առնչվում է ընդամենը մեկ՝ CDMA (Code Division Multiple Access) արտոնագրին: Apple-ի պնդմամբ՝ արտոնագիրը չափորոշիչային է և ոչ խտրական: