Civilnet
Ֆրանսիական France Telecom ընկերության գործադիր տնօրեն Ստեֆան Ռիշարին հունիսի 12-ին մեղադրանք է առաջադրվել այսպես կոչված «Տապպիի» գործով, հաղորդում է AFP-ն:
Ռիշարը մեղադրվում է հանցավոր խմբավորման կազմում մեքենայություններ անելու մեջ: Ֆրանսիական օրենքներով նրան 10 տարվա ազատազրկում է սպառնում:
Ներկայացված մեղադրանքների համաձայն` Ռիշարը կարող է զրկվել Ֆրանսիայի կառավարության կողմից վերահսկվող Orange-ի գործադիր տնօրենի պաշտոնից: Տնօրենների խորհրդի նիստը, որի ընթացքում կքննարկվի այս հարցը, կգումարվի մոտ օրերին:
«Տապպիի» գործը, որով անցնում են Ռիշարն ու Լագարդը, կապված է 1993թ․ գործարար Բեռնար Տապիի՝ Adidas ընկերությունում իր մասնաբաժինը վաճառելու հետ։ Այս գործարքում որպես միջնորդ հանդես էր եկել Credit Lyonnais պետական բանկը, որին Տապին հետագայում դատի էր տվել՝ մեղադրելով խաբեության մեջ և պահանջելով փոխհատուցում։ 2008թ․ Ֆրանսիայի կառավարությունը նրան վճարել էր €285 մլն արբիտրաժային դատարանի որոշմամբ, ուր գործը փոխանցվել էր Լագարդի կարգադրությամբ։
Հետաքննությունը կասկածում է, որ իշխանությունները համաձայնել են այդ գործարքին Տապիի՝ 2007թ․ Նիկոլա Սարկոզիի նախընտրական արշավի ժամանակ (որի արդյունքում Սարկոզին եկավ իշխանության, իսկ Լագարդը դարձավ ֆինանսների նախարար) ֆինանսական աջակցություն ցուցաբերելու դիմաց։
Այս գործով հետաքննություն է իրականացվում նաև դատավոր Պիեր Էստուպի նկատմամբ, որը մասնակցել է Տապիին փոխհատուցում վճարելու որոշման ընդունմանը 2008թ.։ Վերջինս իր մեղքը հերքում է։
Պատմություններ
