Civilnet
Քեսապը գրաված սիրիացի ապստամբները մարտի 25-ին հանդես են եկել հայտարարությամբ՝ վստահեցնելով, որ հարգելու են միջազգային մարդասիրական իրավունքը և հետապնդելու են միայն ռազմական թիրախներ:
Իրենց ֆեյսբուքյան էջում տեղադրված հայտարարությունում նրանք Սիրիայի ծովափնյա շրջանների բնակչությանը կոչ են արել չանհանգստանալ:
«Վստահեցնում ենք, որ մենք պահպանելու, հարգելու և օգնելու ենք բոլոր այն քաղաքացիներին, որոնց ձեռքերը անմեղների արյունով չեն կեղտոտվել»,- ասված է հայտարարությունում:
«Սիրիայի ժողովրդի շահերը և նրանց բարեկեցությունը մեր ծայրահեղ առաջնահերթությունն է։ Այդ պատճառով պարտավոր ենք հարգել միջազգային մարդասիրական իրավունքը և հետապնդում ենք միայն ռազմական թիրախներ, խուսափում ենք թիրախավորել քաղաքացիական օբյեկտները, ինչպիսիք են դպրոցները, հիվանդանոցները, պաշտամունքի վայրերը և բնակելի տները: Մենք հանձնառու ենք հեշտացնելու մարդասիրական օգնության տեղափոխումը և բնակելի տարածքներում միջազգայնորեն արգելված զենքեր չօգտագործել: Մենք վստահեցնում ենք, որ ազնիվ այս սկզբունքները բխում են իսլամական շարիաթից, և մեր դռները բաց են նրանց համար, ովքեր ուզում են մեզ հետ կապվել վերը նշված կամ որևէ այլ հարցում համագործակցելու համար, որը կծառայի մեր սիրելի երկրի՝ Սիրիայի շահերին»:
Հայտարարության տակ ստորագրել են ԱՄՆ-ի կողմից ահաբեկչական կազմակերպությունների ցանկում ներառված «Ալ Նուսրա» ջոկատը, որը հովանավորվում է Կատարի կողմից, ինչպես նաև «Շամ ալ Իսլամ» և «Անսար աշ Շամ» զինյալ ընդդիմադիր խմբավորումները:
Մարտի 23-ին Մեծի Տանն Կիլիկիո կաթողիկոսության հայտարարությունում, ինչպես նաև Մայր Աթոր Սուրբ Էջմիածնի հայտարարությունում նշվում է տների հրկիզման և սրբատեղիների պղծման մասին: ՍիվիլՆեթի աղբյուրները Քեսապի հարակից Մուսալեռ գյուղից (Թուրքիայի սահմանում) հաղորդում են, որ մարտի 24-ի երեկոյան մեծ հրդեհներ են երևացել Քեսապի Քարադուրան գյուղում, որը գտնվում Միջերկրական ծովի ափին:
Մարտի 21-ի վաղ առավոտյան սիրիացի ապստամբների զինված խմբավորումները Թուրքիայի կողմից անցել էին սիրիական սահմանը և հարձակվել Քեսապի հայաբնակ շրջանի ու շրջակա գյուղերի վրա: Մարտի 22-ի երեկոյան Քեսապի գյուղերի բնակչությունն ամբողջությամբ արդեն տարհանվել էր Լաթաքիա:
Պատմություններ
