ՀՀ ԱԳՆ-ն շնորհակալ է Թուրքիային՝ մարդասիրական բեռի առաքման «սահուն կազմակերպմանն օժանդակելու համար»

Հայաստանի արտգործնախարարությունից շնորհակալություն են հայտնել թուրքական կողմին՝ մարդասիրական բեռի առաքման «սահուն կազմակերպմանն օժանդակելու համար»։ ՀՀ ԱԳ նախարարության տարածած հաղորդագրության մեջ նշվում է, որ Սիրիային մարդասիրական օգնություն ուղարկելու նպատակով հայ-թուրքական սահմանի «Մարգարայի» անցակետը բացվել է Թուրքիայի հետ երկկողմ պայմանավորվածության արդյունքում։  

Նախարարությունից հայտնում են, որ Հայաստանի Հանրապետության ԱԳ նախարարի տեղակալ Վահան Կոստանյանի և Սիրիայի Արաբական Հանրապետության արտաքին գործերի և սփյուռքի նախարար Ասաադ Հասան Ալ-Շայբանիի՝ հունվարի 27֊ին կայացած հանդիպման ժամանակ ձեռք բերված պայմանավորվածության հիման վրա մարտի 21-ին Հայաստանի կողմից «Մարգարայի» անցակետով մարդասիրական օգնություն է ուղարկվել Սիրիային:

Սիրիային ուղարկված մարդասիրական բեռը ներառում է սնունդ և բժշկական պարագաներ, որոնք կօգնեն մեղմել պատերազմի և ճգնաժամի հետևանքները բարեկամ սիրիացի ժողովրդի համար:

Մարտի 21-ից 31-ը «Մարգարա» անցակետի բացման մասին որոշումն ընդունվել է կառավարության մարտի 20-ի նիստում։

Հայ-թուրքական սահմանի «Մարգարա» անցակետը վերջին անգամ բացվել էր 2023-ի փետրվարին։ Հարավարևելյան Թուրքիայում փետրվարի 6-ի ավերիչ երկրաշարժից հետո Հայաստանը ցամաքային սահմանով փրկարարական խմբեր և մարդասիրական օգնություն էր ուղարկել այդ երկիր։

Հայաստանը և Թուրքիան 2022-ի հուլիսին պայմանավորվել էին բացել ցամաքային սահմանը երրորդ երկրների քաղաքացիների համար ամենասեղմ ժամկետներում: Սակայն մինչ օրս այդ որոշումն իրականություն չի դարձել։

Հայաստանի և Թուրքիայի միջև ցամաքային սահմանը փակ է 1993-ից: