CivilnetԴամասկոսում մարտի 27-ին նախատեսված է Հայաստանից մեկնած ԱԺ պատվիրակության անդամների հանդիպումը Սիրիայի նախագահ Բաշար ալ Ասադի հետ` քննարկելու սիրիահայության խնդիրները և Քեսապի ապագան: Այս մասին Ֆեյսբուքի իր էջում գրել է պատվիրակության անդամ, ԱԺ պատգամավոր Սամվել Ֆարմանյանը:
«Արդեն Դամասկոսում ենք: Քիչ անց կհանդիպենք Սիրիայի նախագահ Բաշար ալ Ասադին: Մենք երախտապարտ ենք բարեկամ սիրիացի ժողովրդին՝ պատմության ամենածանր պահերին՝ մեր քույրերի ու եղբայրների կողքին լինելու համար, ում համար Սիրիան իրենց տունն է և հայրենիքը, և հուսով ենք, որ քաղաքական համազգային երկխոսությամբ հնարավոր կլինի հասնել խաղաղության և կյանքը տեղափոխել բնականոն հուն»,- գրել է Ֆարմանյանը:
Ավելի վաղ` մարտի 26-ին, Ֆեյսբուքի իր էջում գրառում էր կատարել պատվիրակության անդամներից Արման Սահակյանը:
«Ես հիմա գտնվում եմ Լաթաքիայի հայկական եկեղեցում, որտեղ ապաստան են գտել Քեսապից տեղահանված հայ ընտանիքները: Մի բան կարող եմ ասել. քեսապցի հայ տղամարդիկ իսկական հերոսներ են»,- գրել էր պատգամավորը:
Ազգային ժողովը մարտի 24-ին պատվիրակություն էր ուղարկել Սիրիա` տեղում հայերի խնդիրներին ծանոթանալու և դրանց հնարավոր լուծումներ գտնելու նպատակով: Պատվիրակության կազմում են Սամվել ֆարմանյանը (ՀՀԿ), Լևոն Մարտիրոսյանը (ՀՀԿ), Արման Սահակյանը (ՀՀԿ), Նաիրա Կարապետյանը (ՀՀԿ), Թևան Պողոսյանը («Ժառանգություն») ու Էդմոն Մարուքյանը (անկախ պատգամավոր):
Արտգործնախարար Էդվարդ Նալբանդյանը մարտի 27-ին` կառավարության նիստին, ասել է, որ պատվիրակությունը մարտի 28-ին կվերադառնա Հայաստան: Վարչապետ Տիգրան Սարգսյանը իր հերթին հայտարարել է, որ կառավարությունը քայլեր է ձեռնարկում սիրիահայերի հոգսերը թեթևացնելու ուղղությամբ:
Մարտի 21-ի վաղ առավոտյան սիրիացի ապստամբների զինված խմբավորումները Թուրքիայի կողմից անցել էին սիրիական սահմանը և հարձակվել Քեսապի հայաբնակ շրջանի ու շրջակա գյուղերի վրա: Մարտի 22-ի երեկոյան Քեսապի գյուղերի բնակչությունն ամբողջությամբ արդեն տարհանվել էր Լաթաքիա:
Սիրիա մեկած Աժ պատվիրակության անդամները մարտի 24-ին հայտարարություն էին տարածել, որում անդրադարձել էին Սիրիայի հայաբնակ Քեսապ շրջանում տեղի ունեցող իրադարձություններին և հայերի տեղահանմանը: Նրանք կոչ էին արել կառավարությանը պաշտպանել սիրիահայերին:
Պատմություններ
