CivilnetՄիավորված ազգերի կազմակերպության գլխավոր քարտուղար Բան Կի Մունի քաղաքական հարցերով պատասխանատու Ջեֆրի Ֆելթմանը մարտի 27-ի երեկոյան զանգահարել է Մեծի Տանն Կիլիկիո կաթողիկոս Արամ Ա-ին։
Ինչպես հաղորդում է կաթողիկոսության պաշտոնական կայքը, Ֆելթմանը Արամ Ա-ին հայտնել է, որ ՄԱԿ-ը մտահոգ է Քեսապում ստեղծված իրավիճակով` հավելելով, որ ինքն այս հարցով հանդիպել է Սիրիայի հարցով ՄԱԿ-ի հատուկ ներկայացուցիչ Լախդար Բրահիմիի, ինչպես նաև՝ ՄԱԿ-ում Հայաստանի և Թուրքիայի դեսպանների հետ։ Արամ Ա-ն Ֆելթմանին է ներկայացրել Քեսապում տիրող վիճակն ու ընդգծել թուրքական գործոնի կարևորությունը։
Նա ՄԱԿ-ին առաջարկել է քննել Քեսապի շրջանն ապազինելու հնարավորությունը։ Ֆելթմանը կառուցողական է համարել Վեհափառի առաջարկը, և խոստացել այդ հարցով խորհրդակցություն ունենալ Լախդար Բրահիմիի հետ։
Արամ Ա-ն մարտի 26-ին երկրորդ պատվիրակությունն էր ուղարկել Լաթաքիա, որի պարտականությունն էր կաթողիկոսարանի կողմից նյութական օժանդակություն փոխանցել Շտապ օգնության մարմնին:
Մարտի 21-ի վաղ առավոտյան սիրիացի ապստամբների զինված խմբավորումները Թուրքիայի կողմից անցել էին սիրիական սահմանը և հարձակվել Քեսապի հայաբնակ շրջանի ու շրջակա գյուղերի վրա: Մարտի 22-ի երեկոյան Քեսապի գյուղերի բնակչությունն ամբողջությամբ արդեն տարհանվել էր Լաթաքիա:
Պատմություններ
