Ապրիլի 24-ին Էյֆելյան աշտարակի լույսերը կանջատվեն

Ապրիլի 24-ին Փարիզի Էյֆելյան աշտարակի լույսերը կանջատվեն ի հիշատակ Հայոց ցեղասպանության զոհերի: Այս մասին ֆեյսբուքյան իր էջում տեղեկացրել է Ֆրանսիայում Հայաստանի դեսպանությունը: Լույսերը Փարիզի քաղաքապետարանի որոշմամբ կանջատվեն ժամը 22-ին՝ Երևանի ժամանակով կեսգիշերին՝ խորհրդանշելով Փարիզի սգո տուրքը Հայոց ցեղասպանության զոհերի հիշատակին: Ֆրանսիան Հայոց ցեղասպանության մասին օրենքը ընդունել է 2001թ.: 100-րդ տարելիցին նվիրված ապրիլքսանչորսյան միջոցառումներին Երևանում Ֆրանսիայի պատվիրակությունը կգլխավորի նախագահ Ֆրանսուա Օլանդը: Վերջինս Երևան կժամանի 120-150-հոգանոց պատվիրակությամբ: