ՌԴ Պետդուման Ցեղասպանության 100-րդ տարելիցի կապակցությամբ հայտարարություն է ընդունել

Ռուսաստանի Դաշնության Պետդուման ապրիլի 24-ին ընդունել է հայտարարություն՝ Հայոց ցեղասպանության 100-րդ տարելիցի կապակցությամբ: «ՌԻԱ նովոստի» գործակալության փոխանցմամբ՝ Պետդումայի պատգամավորները, ցավակցություն հայտնելով «եղբայրական հայ ժողովրդին», հայտարարել են, որ «Եվրասիական մայրցամաքը կարող է և պետք է դառնա բարիդրացիականության և իրավահավասար համագործակցության օրինակ, խաղաղության ու արարման տարածք»: Այդ նպատակին հասնելու համար, ըստ ռուսաստանցի օրենսդիրների, կարևոր է «բազմակողմանի գործունեությունն» այնպիսի միջազգային կազմակերպություններում, ինչպիսիք են Եվրասիական տնտեսական միությունը, Հավաքական անվտանգության պայմանագրի կազմակերպությունը, Շանհայի համագործակցության կազմակերպությունը: Ռուսաստանի Պետդուման 1995թ.  1915-1922 թթ. Ցեղասպանություն իրագործողներին դատապարտող և ապրիլի 24-ը Հայոց ցեղասպանության զոհերի հիշատակի օր ճանաչող հռչակագիր է ընդունել: