Civilnet
ՀՀ արտգործնախարար Էդվարդ Նալբանդյանը մայիսի 27-ին մեկնել է Դամասկոս:
Ինչպես հաղորդում են արտգործնախարարության մամուլի ծառայությունից, այցի շրջանակում նախատեսված են հանդիպումներ Սիրիայի բարձրագույն ղեկավարության, ինչպես նաև սիրիահայ համայնքի ներկայացուցիչների հետ։
Հանդիպումների ընթացքում ի թիվս մի շարք այլ հարցերի` քննարկվել են միջինարևելյան զարգացումները և դրանց հետևանքով ստեղծված իրավիճակը։
Իր պաշտոնակցի հետ հանդիպմանն անդրադառնալով Լիբանանի հարավում խաղաղապահ առաքելության կազմում հայկական զորախմբի մասնակցությանը` Նալբանդյանը նշել է, որ Հայաստանը նախատեսում է ավելացնել Լիբանանում տեղակայված իր զորախմբի թվաքանակը:
Բեյրութում ՀՀ արտգործնախարարն այցելել է նաև Լիբանանում ՀՀ դեսպանություն և հանդիպել Լիբանանի հայ համայնքային կառույցների ղեկավարների և ներկայացուցիչների հետ:
***
Սիրիայում 2011-ից շարունակվում է պատերազմը, որի հետևանքով զոհվել է ավելի քան 200 հազար մարդ, մոտ 3 միլիոն մարդ դարձել է փախստական: Սիրիահայերից շատերը ապաստան են գտել Լիբանանում և Հայաստանում: Այս տարվա փետրվարին ՀՀ սփյուռքի նախարար Հրանուշ Հակոբյանը հայտարարել էր, որ Հայաստանում ավելի քան 12 հազ. սիրիահայ կա:
Կառավարության մայիսի 21-ի նիստին Հրանուշ Հակոբյանն անդրադարձել էր սիրիահայերի խնդիրներին և նշել էր, որ իր ղեկավարած կառույցը գումարել է միջգերատեսչական հանձնաժողովի նիստ՝ հասկանալու, թե Հայաստանը ինչ կարող է անել և ինչպես աջակցել Սիրիայում ապրող հայերին: Նա նաև ասել էր, թե քաղաքական ղեկավարության հետ քննարկումների արդյունքում արտգործնախարար Էդվարդ Նալբանդյանն օրերս կլինի Սիրիայում:
Պատմություններ
