Civilnet
«Վերադարձ Հայաստան» հիմնադրամի և Ayo! նախաձեռնության համատեղ ջանքերով ստեղծվել է ինտերնետային հարթակ, որը թույլ է տալիս շատ արագ տեղեկատվություն գտնել այն ձեռնարկությունների մասին, որոնք Երևանում հիմնել են սիրիահայերը:
Նոր գործարկված Siramark.am կայքում առկա են տեղեկություններ սիրիահայերի հիմնած ռեստորանների, խանութների, սրճարանների և այլ բիզնեսների մասին: Հիմնադիրներն ասում են, որ նոր հարթակը սիրիահայ գործարարներին թույլ է տալիս ընդլայնել ու կայունացնել իրենց հաճախորդների շրջանակը:
Նոր կայքում ոչ միայն քարտեզագրված են սիրիահայերին պատկանող ձեռնարկությունները, այլև կան պատմություններ հիմնադիրների մասին՝ թե ինչպես են փախել պատերազմից, եկել Հայաստան և բիզնես հիմնել:
Նման օրինակ է AVA կոշիկ արտադրող ձեռնարկությունը, որի առաջին խանութը բացվել է 2014թ. դեկտեմբերին: AVA-ի սեփականատերերն են երեք սիրիահայեր՝ Անդրանիկ Սաֆարը, Վիգեն Դոլմաղլյանն ու Անդո Էլեյջյանը: Ըստ կայքի՝ երիտասարդ գործարարները «ցանկանում են խրախուսել, որ հայերի նոր սերունդը մնա Հայաստանում, սփյուռքահայերն էլ՝ հայրենադարձվեն»: Նրանք կարծում են, որ երկրին անհրաժեշտ է, որ երիտասարդությունը ձեռնարկություններ հիմնի, աշխատատեղեր ստեղծի և բարելավի տնտեսությունը:
***
2011թ. սիրիական հակամարտության սկզբից ի վեր զոհվել է ավելի քան 200 հազ. մարդ, երկրի բնակչության ավելի քան մեկ երրորդը տեղահանվել է, 3 մլն-ից ավելի մարդ դարձել է փախստական: Բազմաթիվ սիրիահայեր ապաստան են գտել Լիբանանում և Հայաստանում: Հայաստանի սփյուռքի նախարարության տվյալներով՝ Հայաստանում ապրում է մոտ 12 հազ. սիրիահայ:
Ayo! նախաձեռնությունը հիմնադրվել է Հայկական նպաստամատույց հիմնադրամի (Armenian Relief Fund) կողմից: Նախաձեռնության նպատակն է ասել «այո» հայերի նորարար գաղափարներին և տեղական նախաձեռնություններին:
«Վերադարձ Հայաստան» հիմնադրամը ստեղծվել է 2012թ.՝ աջակցելու աշխարհի հայերին, որոնք որոշել են հայրենադարձվել:
Պատմություններ
