Civilnet
Հունիսի 20-ին Հալեպի քաղաքապետարանի շենքի հրթիռակոծության հետևանքով երկու հայ է զոհվել, տեղեկացնում է Հալեպի «Գանձասար» թերթի ֆեյսբուքյան էջը:
Զոհվածներից մեկի անունն է Էդուարդ Պետրոսյան (Ստեփանյան), որը Հայ ավետարանական եկեղեցու միսիոներ է: Մյուս զոհվածը Հալեպի բնակիչ Կարո Մկրտչյանն է (Աբու Հակոբ):
Ավելի վաղ՝ ապրիլին գնդակոծվել էր Հալեպի հայաշատ Սուլեյմանիե թաղամասը, ինչի հետևանքով տասնյակից ավելի հայեր էին զոհվել:
***
Մայիսի 27-ին Սիրիա էր մեկնել Հայաստանի արտգործնախարար Էդուարդ Նալբանդյանի գլխավորած պատվիրակությունը, որը հանդիպումներ էր ունեցել Սիրիայի նախագահ Բաշար Ասադի և այլ ղեկավարների հետ:
Ներկայում, տարբեր տվյալներով, Հալեպում մնացած հայ բնակչության թիվը գնահատվում է մի քանի հազար: Հալեպահայերին տարհանելու հարցում Հայաստանի կառավարության դիրքորոշումն այն է, որ որոշումը պետք է ինքը համայնքը ընդունի:
Սիրիայում 2011-ից բռնկված ապստամբությունը, որը վերաճել է լայնածավալ քաղաքացիական պատերազմի, արդեն խլել է ավելի քան 200 հազար կյանք, մոտ 3 միլիոն մարդ դարձել է փախստական: Սիրիահայերից շատերը ապաստան են գտել Լիբանանում և Հայաստանում: ՀՀ Սփյուռքի նախարարության տվյալներով Հայաստանում, հիմնականում՝ Երևանում, ապաստան է գտել մինչև 12 հազար սիրիահայ:
Պատմություններ
