Պայթյուններ Կամիշլիում. վիրավորների թվում կան հայեր (լրացված)

Հունվարի 24-ին երկու ուժգին պայթյուն է որոտացել Սիրիայի Կամիշլի քաղաքում, հաղորդում է Հալեպի «Գանձասար» թերթը:

Նախնական տեղեկություններով` զոհվել է երեք մարդ, վիրավորվել է վեցը, որոնցից մեկը հայ է:

«Գանձասարը» նշում է, որ ըստ պաշտոնական աղբյուրների` պայթել են ահաբեկչական խմբավորումների կողմից հեծանիվի մեջ տեղադրված ականները:

14:30

«Գանձասար» թերթի ֆեյսբուքյան էջը տեղեկացնում է, որ պայթյունների հետևանքով վիրավորվել է երկու հայ` Մհեր Պողոսյանը և Հակոբ Միրզոյանը:

***

Սիրիայում 2011-ից քաղաքացիական պատերազմ է ընթանում, որի հետևանքով զոհվել է ավելի քան 250 հազ. մարդ, միլիոնավոր սիրիացիներ դարձել են փախստական:

Բազմաթիվ սիրիահայեր պատերազմի հետևանքով ապաստան են գտել Լիբանանում և Հայաստանում:

2012-2015թթ. Հայաստան է եկել շուրջ 17 000 սիրիահայ, որից շուրջ 4000-ը մեկնել է այլ երկրներ: Ներկայում Հայաստանում տարբեր գնահատականներով մոտ 12 000 սիրիահայ կա, որոնց գերակշիռ մասը բնակվում է Երևանում: