Մենք ամեն կերպ ողջունելու ենք հայ և ադրբեջանցի մտավորականների միջև ուղիղ երկխոսությունը․ Զախարովա

Մոսկվան կողջունի հայ և ադրբեջանցի մտավորականների միջև ուղիղ երկխոսության հաստատումը։ Այս մասին այսօր՝ հունվարի 15-ին, կայացած ճեպազրույցի ժամանակ հայտարարել Է Ռուսաստանի ԱԳՆ պաշտոնական ներկայացուցիչ Մարիա Զախարովան՝ պատասխանելով «Մոսկվա-Բաքու»-ի հարցին, թե հնարավոր է, որ Ռուսաստանը Հայաստանի և Ադրբեջանի համաձայնությամբ ադրբեջանական և հայ մտավորականության, հասարակության ներկայացուցիչների երկխոսության հարթակներ ստեղծի։ «Մենք ամեն կերպ ողջունելու ենք հայ և ադրբեջանցի մտավորականների միջև ուղիղ երկխոսության հաստատումը, ինչպես նաև երկու երկրների միջև հումանիտար բնույթի համատեղ միջոցառումների անցկացումը: Մեր կարծիքով՝ նման նախաձեռնությունները նպաստում են հաշտեցման, վստահության, փոխըմբռնման մթնոլորտի ձևավորմանը, օգուտ են բերում ինչպես ադրբեջանական, այնպես էլ հայ ժողովուրդներին և սկզբունքորեն Հարավային Կովկասի ողջ տարածաշրջանին, ինչը նշանակում է՝ նաև Ռուսաստանի Դաշնությանը: Ռուսական կողմը կսատարի նման մարդասիրական ակցիաները, եթե Բաքուն և Երևանն անկեղծ տրամադրվածություն դրսևորեն այդ ուղղությամբ շարժվելու համար»,- ասել է Զախարովան։