Civilnet
Բրյուսելում Եվրոպական խորհրդի նախագահ Շառլ Միշելի միջնորդությամբ Ադրբեջանի նախագահի հետ հանդիպման ժամանակ Աղդամից դեպի Ստեփանակերտ բեռների մատակարարման հարց Նիկոլ Փաշինյանը չի քննարկել․ այդ մասին նա հայտարարեց հուլիսի 25-ի ասուլիսի ժամանակ։
«Նման հարց քննարկեու մանդատ չունեմ։ Լաչինի միջանցքը ստեղծվել է եռակողմ հայտարարությամբ, դա ստորագրել եմ ես, դրա քննարկան մանդատն ունեմ»,- ասաց Փաշինյանը՝ ավելացնելով, որ Շառլ Միշելի՝ այդ ճանապարհով մատակարարումներ իրականացնելու մասին հայտարարությունը անակնկալ չէր, բայց ինքը նման հարց չի քննարկել, քանի որ ոչ դրա անհրաժեշտությունն է տեսնում, ոչ էլ նման մանդատ ունի։
Փաշինյանը նաև հայտարարեց՝ Լաչինի միջանցքում ստեղծված իրադրության հասցեագրումն ու կարգավորումը պետք են Հայաստանին ու Արցախին։
«Միջազգային հանրությունը չի կրում այդ տառապանքը, ո՞վ է ասել որ միջազգային հանրությանը ավելի շատ է հարկավոր պրոբլեմների լուծումը քան ՀՀ-ին»,- ասաց Փաշինյանը։
Հարցին՝ ինչու պաշտոնական Երևանը որևէ կերպ չարձագանքեց Եվրոպական խորհրդի նախագահ Շառլ Միշելի՝ «Աղդամից հումանիտար մատակարարումներ» իրականացնելու հայտարարությանը, Նիկոլ Փաշինյանը պատասխանեց․ «Որովհետև մենք մանդատ չունենք այդ հարցը քննարկելու, որովհետև արձագանքն էլ ինքնին նշանակում է այդ հարցը քննարկել։ Մենք կարող ենք քննարկել այն հարցը, որի քննարկումը վերաբերում է մեզ»։
Պատմություններ
