Բլինքենը Փաշինյանի և Ալիևի հետ հեռախոսազրույցներում քննարկել է խաղաղության պայմանագիրը

Միացյալ Նահանգների պետքարտուղար Էնթոնի Բլինքենը հեռախոսազրույցներ է ունեցել Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի հետ, հայտնում են ԱՄՆ պետքարտուղարությունից։

Բլինքենն ու Փաշինյանը քննարկել են ԱՄՆ աջակցությունը Հայաստանի ու Ադրբեջանի միջև ամուր և արժանապատիվ խաղաղության համաձայնագրի հասնելու ջանքերին․ «Պետքարտուղարը վերահաստատել է Միացյալ Նահանգների շարունակական աջակցությունը Հայաստանի ինքնիշխանությանը և տարածքային ամբողջականությանը»,- նշված է հաղորդագրությունում:

Ադրբեջանի նախագահի հետ զրույցում Բլինքենը ողջունել է խաղաղության պայմանագիր կնքելու հարցում Ալիևի հանձնառությունը․ «Պետքարտուղարն ընդունել է տառապանքները, որոնք այս երկարատև հակամարտությունը պատճառել է ինչպես ադրբեջանցիներին, այնպես էլ հայերին: Նա ընդգծել է այն առավելությունները, որոնք տարածաշրջանում կհայտնվեն խաղաղության հաստատումից հետո»։

Ալիևն ու Բլինքենը անդրադարձել են նաև Ադրբեջանի և ԱՄՆ հարաբերություններում «վերջին անհանգստացնող կետերին»։