Civilnet
Տարածաշրջանում խաղաղության ու կայունության հաստատումը շատ մոտ է, հայտարարել է Թուրքիայի արտգործնախարար Հաքան Ֆիդանը։
Բաքվում Ադրբեջանի արտգործնախարար Ջեյհուն Բայրամովի հետ դեկտեմբերի 14-ի համատեղ ասուլիսին Ֆիդանն ասել է, որ Հայաստանի հետ Թուրքիայի հարաբերությունները կբարելավվեն այն բանից հետո, երբ կկարգավորվեն Ադրբեջանի և Հայաստանի հարաբերությունները, հաղորդում է ադրբեջանական ԱՊԱ գործակալությունը։
«Մենք բարձր ենք գնահատում Ադրբեջանի և Հայաստանի միջև վերջերս ձեռք բերված համաձայնությունը։ Մենք շատ մոտ ենք տարածաշրջանում խաղաղությանն ու կայունությանը։ Կշարունակենք սերտ շփումներն Ադրբեջանի հետ այդ ուղղությամբ»,- ասել է Ֆիդանը։
Նրա խոսքով՝ խաղաղության համաձայնագրից հետո տարածաշրջանում պետք է սկսվի «բարգավաճման և զարգացման շրջան»։
«Մենք կարծում ենք, որ տարածաշրջանում այլևս տեղ չկա պատերազմի, հակամարտության համար։ Եթե Ադրբեջանի և Հայաստանի հարաբերությունները կարգավորվեն, անմիջապես կկարգավորվեն Թուրքիայի հարաբերությունները Հայաստանի հետ։ Մենք պաշտպանում ենք Ադրբեջանի և Հայաստանի միջև հարաբերությունները նորմալացնելու ուղղությամբ քննարկումները, այդ ոլորտում պատրաստ ենք կատարել մեր առջև դրված ցանկացած խնդիր: Մենք դեմ ենք որոշ երկրների ոչ ճիշտ մոտեցումներին»,- նշել է Թուրքիայի ԱԳ նախարարը։
Ադրբեջանի արտգործնախարար Ջեյհուն Բայրամովն էլ հայտարարել է, թե հայ-ադրբեջանական հարաբերությունների կարգավորման համար պատմական հնարավորություն է ստեղծվել։
«(Հաքան Ֆիդանի հետ – խմբ․) բանակցությունների ընթացքում ներկայացրել եմ ադրբեջանական կողմի տեսակետը Հայաստանի հերթական մեկնաբանությունների (խաղաղության պայամանգրի նախագծի վերաբերյալ հայկական կողմի 6-րդ առաջարկի – խմբ․) վերաբերյալ։ Առաջիկայում կներկայացվի Ադրբեջանի դիրքորոշումն այդ կապակցությամբ»,- ասել է նա։
Բայրամովը նաև կարծիք է հայտնել, թե բանակցություններին Թուրքիայի մասնակցությունը ձեռնտու կլինի Հայաստանին․ «Որպես տարածաշրջանի երկիր՝ Թուրքիան աջակցում է տարածաշրջանում խաղաղության, կայունության հաստատմանը։ Եթե Հայաստանը հետևի այդ տրամաբանությանը, ապա նրա համար ձեռնտու կլիներ Թուրքիային տեսնել բանակցությունների սեղանի շուրջ։ Այժմ որոշումը Հայաստանն է։ Վերջին շրջանում Ադրբեջանն աջակցում է Թուրքիայի և Հայաստանի միջև հարաբերությունների կարգավորմանը»։
Ադրբեջանի ԱԳՆ ղեկավարը նշել է, որ Բաքուն մերժում է Հայաստանի հետ սահմանից զորքերը հայելային ետ քաշելու՝ Երևանի առաջարկ, ինչի մասին խոսել է ՀՀ արտգործնախարար Արարատ Միրզոյանը։
«Կարճ կպատասխանեմ՝ ես համաձայն չեմ Հայաստանի արտգործնախարարի հետ։ Հայ-ադրբեջանական սահմանը դելիմիտացված չէ, դա բավականին բարդ հարց է։ Եթե զորքերը հետ քաշվեն՝ առանց ամբողջական համաձայնության, ո՞վ կարող է երաշխավորել, որ կողմերից մեկը կրկին դիրքեր չի գրավի»,- արձագանքել է Բայրամովը։
Պատմություններ
